«Salaýatty ult» ár azamat úshin sapaly jáne qoljetimdi densaýlyq saqtaý» ulttyq jobasy aiasynda 2025 jylǵa deiin múgedektigi bar balalardy ońaltýǵa arnalǵan 8 ortalyq salynady. Bul týraly QR Densaýlyq saqtaý ministri Aleksei Tsoi Ortalyq kommýnikatsiialar qyzmetinde ótken brifingide málim etti, dep habarlaidy QazAqparat.
«Ulttyq joba aiasnyda júkti áielder men balalardyń densaýlyǵyn saqtaý úshin birneshe shara qarastyrylǵan. Birinshiden, júkti áielderdi bosanǵanǵa deiingi baqylaýmen qamtý kózdelgen. Ekinshiden, 1 jasqa deiingi balalardy proaktivti baqylaýmen jáne skriningtermen qamtamasyz etý qarastyrylǵan», - degen vedomstvo basshysy 8 óńirde balalardy ońaltý ortalyǵy ashylatynyn atady.
«Úshinshiden, 8 óńirde balalardy ońaltýǵa arnalǵan 8 ortalyq jáne 2 erte aralasý ortalyǵyn qosymsha ashý josparlanǵan. Bul múmkindigi shekteýli balalardy meditsinalyq ońaltýmen qamtýdy 3 ese – 18-den 60% deiin arttyrýǵa múmkindik beredi.
Halyqqa sapaly qyzmet kórsetý kóbinese biliktilikke jáne qajetti mamandardyń bolýyna bailanysty. Sondyqtan ulttyq jobanyń birinshi baǵyty aiasynda asa tapshy mamandyqtar boiynsha rezidentýralyq bilim berý granttarynyń sany 3800-ge deiin, sondai-aq álemniń jetekshi ortalyqtarynda qarqyndy terapiianyń halyqaralyq standarttary boiynsha oqytylǵan dárigerler sany kóbeitiletin bolady», - dedi ministr.
