Sýret: pixabay
Bas prokýratýra 8 naýryz qarsańynda alaiaqtardyń belsendiligi artatynyn eskertti, dep habarlaidy Ult.kz.
Halyqaralyq áielder kúni qarsańynda alaiaqtar azamattardyń merekelik qarbalasyn paidalanyp, olardyń aqshasy men jeke derekterine qol jetkizýge tyrysady. Bul kezeńde gúlder men syilyqtarǵa tapsyrystar kóbeiip, onlain-tólemder sany artady. Osyndai jaǵdaidy paidalanǵan alaiaqtar túrli ailaǵa baryp, adamdardy aldap soǵýy múmkin.
Mereke aldynda olar azamattarǵa qońyraý shalyp nemese habarlama jiberip, ártúrli syltaýmen bir rettik SMS-kodty aitýdy suraidy.
Eń kóp taralǵan tásilder mynalar:
gúl nemese syilyq jetkizý rásimdelgenin aityp, «tapsyrysty rastaý úshin» SMS-kod suraý;
jalǵan utys, bonýs nemese aktsiia týraly habarlap, telefonǵa kelgen rastaý kodyn talap etý;
ózderin bank qyzmetkeri, qaýipsizdik qyzmetiniń ókili nemese kýrerlik kompaniia qyzmetkeri retinde tanystyrý.
Bas prokýratýranyń málimetinshe, bir rettik SMS-kod – qarjylyq operatsiialardy rastaýǵa arnalǵan qupiia qural. Ony úshinshi tulǵalarǵa berý bank shotynan aqsha sheshilýine, sizdiń atyńyzǵa nesie rásimdelýine nemese bank qosymshańyzǵa bógde adamdardyń qol jetkizýine ákelýi múmkin.
Sondai-aq bankterdiń qyzmetkerleri de, quqyq qorǵaý organdary da telefon arqyly SMS-kod, qupiiasóz nemese bank kartasynyń derekterin suratpaityny eskertildi.
Kei jaǵdaida jetkizý qyzmetteri nemese bank ónimderin rásimdeý kezinde rastaý kody shynymen qoldanylýy múmkin. Alaida mundai kod tek ózińiz aldyn ala bergen tapsyrysty rastaý úshin paidalanylady. Eger jetkizý týraly kútpegen qońyraý kelip, sizden kod suralsa, áńgimeni birden toqtatqan jón.
Budan bólek, mereke qarsańynda alaiaqtar áleýmettik jelilerde, sonyń ishinde Instagram men TikTok platformalarynda jalǵan paraqshalar ashyp, gúlder men syilyqtardy óte arzan baǵada nemese úlken jeńildikpen usynyp, aldyn ala tólem talap etedi. Aqsha aýdarylǵannan keiin mundai paraqshalar jabylyp, satýshylarmen bailanys úziledi.
Osyǵan bailanysty prokýratýra azamattarǵa:
gúlder men syilyqtardy tek senimdi satýshylardan tapsyrys berýdi;
tólem jasar aldynda alýshynyń derekterin muqiiat tekserýdi;
kúmándi siltemelerge ótpeýdi;
eshbir jaǵdaida bógde adamdarǵa SMS-kod pen bank derekterin bermeýdi usynady.
Eger kúmándi jaǵdai týyndasa, bankke resmi nómir arqyly ózińiz habarlasyp, qajet bolǵan jaǵdaida quqyq qorǵaý organdaryna júgingen jón.
