«Qazaqstandyq indýstriia jáne eksport ortalyǵy» AQ, oblystyq kásipkerlik jáne indýstriialyq-innovatsiialyq damý basqarmasy jáne iri kásiporyn basshylarynyń qatysýymen seminar ótti. Ashyq dialog formatyndaǵy sharada shaǵyn jáne orta kásipkerlikti qoldaý jaiy sóz boldy.
Baiandama jasaǵan «Qazaqstandyq indýstriia jáne eksport ortalyǵy» AQ tóraǵasynyń orynbasary Murat Bekmagambetov oblystaǵy ekonomikalyq ósimdi baqylap otyratyndyǵyn jetkizdi.
– Sońǵy 8 aidyń ishinde Almaty oblysynda 502,2 mlrd. teńgeniń ónimi óndirildi. Bul byltyrǵy jylmen salystyrǵanda 2,2 paiyzǵa kóp. Óńirdiń 30-dan asa kásiporny ónimderin eksporttaidy. Sondai-aq, kez kelgen kásiporynǵa naryqta brendti qalyptastyrýǵa, grant, tapsyrystardy alýǵa kómektesýge ázirmiz, – degen Murat Maratuly kásiporyn sýbektilerine memleket tarapynan kórsetiletin kómekke toqtaldy.
Óz kezeginde oblystyq kásipkerlik jáne indýstriialyq-innovatsiialyq damý basqarmasynyń mamany Meiramgúl Shakinova aimaqtyń óndiris áleýetin 1300-den asa kásiporyn kórsetetindigin aita kele:
– «Eksport 2020» baǵdarlamasy aiasynda 2018 jyly jergilikti kásip-oryndar Mońǵoliia, BAÁ uiymdastyrǵan saýda missiiasyna qatysty. Máskeý, Ashhabad, Tashkent jáne Shanhai syndy qalalarda ótken kórmege «Dolce» JShS, «Tikkýrila», «Lepsi ónimi», «Sintez-KZ» meditsina holdingi qatysyp qaitty. Odan bólek, «Ónimdilik 2020» baǵdarlamasy aiasynda 2018-2019 jyldary tehnologiialyq protsesterdi tolyqtyrý maqsatynda 80 mln. teńge qarjy bólingen, – dedi.
Sondai-aq, jiyn barysynda qatysýshylar tarapynan ónimdi eksporttaýdyń tiimdi joldary, brendti qalyptastyrýǵa bailanysty suraqtar qoiyldy.
Seminar sońynan «QIEO» AQ jáne oblystyq basqarma basshylary ekeýara yntymaqtastyq memorandýmyna qol qoidy.
Eńlik QABDESh
