Foto: ashyq derekkóz
Qazaqstannyń ornyqtylyq qory «7-20-25» ipotekalyq baǵdarlamasyna qatysty alaiaqtyq áreketterdiń kóbeigenin eskertti, dep habarlaidy Ult.kz.
Qor málimetinshe, ózin ipotekalyq broker, keńesshi nemese deldal retinde tanystyratyn kúmándi tulǵalar azamattarǵa aqyly «kómek» usynyp júr. Olar kezekti «jedeldetý», ótinimdi «maquldatýǵa kepildik berý» nemese bank limitin «alyp berý» siiaqty jalǵan qyzmetterdi alǵa tartady.
Alaida mamandar mundai usynystardyń barlyǵy shyndyqqa janaspaitynyn aitady. Qazirgi tańda baǵdarlamaǵa qatysýshy bankter ótinimderdi tolyqtai onlain qabyldaidy. Júie avtomattandyrylǵan, al kezek elektrondy túrde qalyptasady. Sondyqtan úshinshi tulǵalardyń bul protseske aralasýy tehnikalyq turǵydan múmkin emes.
Qor azamattardy deldaldarǵa aqsha tólemei, ótinimdi óz betinshe berýge shaqyrady. Bul tegin ári barshaǵa teń qoljetimdi.
Sondai-aq qurylys kompaniialarynyń satý bólimderinde de saq bolý qajet. Eger menedjerler qosymsha aqy surap, páter tańdaýǵa nemese ipoteka rásimdeýge «kómek» usynsa, bul zańsyz áreket bolýy múmkin. Mundai jaǵdaida kompaniia basshylyǵyna shaǵymdaný usynylady.
Budan bólek, qor atynan messendjerlerde, sonyń ishinde WhatsApp arqyly keletin habarlamalarǵa senbeý kerek. Belgisiz siltemelerge ótpei, olardy birden óshirip, jiberýshini buǵattaý qajet. Sebebi alaiaqtar ziiandy faildar arqyly jeke derekterdi urlaýy múmkin.
Qazaqstannyń ornyqtylyq qory óz qyzmetkerleri azamattarmen messendjerler arqyly bailanys jasamaitynyn atap ótti.
Eger alaiaqtyq faktilerine tap bolsańyz, dereý quqyq qorǵaý organdaryna júginý qajet.
