Foto: QR OAM
Pedagogter úshin eń mańyzdy áleýmettik kepildikterdiń biri - jyl saiynǵy aqyly eńbek demalysyna shyǵý ýaqytynyń uzaqtyǵyn belgileý. Onyń uzaqtyǵy barlyq pedagog úshin 56 kúntizbelik kúndi quraidy, dep habarlaidy QR Oqý-aǵartý ministrliginiń baspasóz qyzmeti.
Pedagogterge jyl saiynǵy aqyly eńbek demalysynyń 2 túri beriledi: negizgi jáne qosymsha.
Qosymsha demalys ekologiialyq qolaisyz jáne radiatsiialyq qaýpi bar aýmaqtarda turatyn pedagogter úshin qarastyrylǵan. Onyń ishinde ekologiialyq qolaisyz aýmaqtarda turatyn pedagogter úshin qosymsha demalystyń uzaqtyǵy 7 kúnnen 12 kúnge deiingi, al radiatsiialyq qaýipti aýmaqtarda turatyn pedagogter úshin 5 kúnnen 14 kúnge deiingi merzimdi quraidy. Demalys ýaqytyna túsken mereke kúnderi eńbek demalysyna kirmeidi. Eńbek demalysyn berý kezinde naqty jumys istegen ýaqyt qana esepke alynady.
«Eńbek demalysyn berý kezinde saýyqtyrýǵa arnalǵan járdemaqy laýazymdyq jalaqy mólsherinde tólenedi. Saýyqtyrý járdemaqysynyń mólsherin esepteý pedagogtiń demalys berilgen kúngi naqty júktemesin eskere otyryp, laýazymdyq aqy mólsherinde júrgiziledi, munda qosymsha aqylar men ústemeaqylar eseptelmeidi. Sondai-aq, qyzmetkerdiń tolyq emes jumys ýaqyty rejiminde jumys isteýi jyl saiynǵy aqyly eńbek demalysynyń uzaqtyǵyn qysqartýǵa negiz bolmaidy — demalys tolyq kólemde beriledi», - deidi Biýdjettik josparlaý departamenti Eńbekaqy tóleý ádisnamasy basqarmasynyń basshysy Gúlaiym Toqpanova.
Pedagog qosymsha jumysty nemese ýaqytsha bolmaǵan qyzmetkerdiń mindetterin óziniń negizgi jumysynan bosatylmai oryndaǵan jaǵdaida bul laýazymdardy qatar atqarý bolyp tabylady. Bul jaǵdaida saýyqtyrýǵa arnalǵan járdemaqy pedagogke negizgi laýazymy boiynsha ǵana tólenedi. Eger pedagog qosymsha jumysty laýazymdardy qosa atqarý týraly jeke eńbek sharty boiynsha negizgi jumystan bos ýaqytynda atqarsa, saýyqtyrýǵa arnalǵan járdemaqy negizgi jumys úshin de, qosymsha jumys úshin de bólek tólenýi tiis.
QR Oqý-aǵartý ministrligi pedagogterdiń eńbek quqyqtaryn qatań saqtaý, jyl saiynǵy eńbek demalysyn ýaqytyly berý jáne tiisti járdemaqylardy tóleý boiynsha mindettemelerdiń ýaqytyly oryndalýy qajettigin nazarǵa salady. Bul talaptardyń oryndalýyna árbir bilim berý uiymy derbes jaýapty ekenin eskertedi.
