Foto: stockphoto.com
Búgin halyqaralyq volonterler kúni. Aitýly data kúntizbede 1985 jyly BUU-nyń bastamasymen paida bolǵan. Kúlli álemge izgilik nuryn shashqan osy bir eriktiler qozǵalysy bizdiń elde de belsendi damyp keledi, dep habarlaidy Ult.kz 24kz-ke silteme jasap.
Qazirgi tańda óńir-óńirde 240 myńnan astam volonter qaiyrymdylyq qyzmetin atqaryp júr. Dese de volonterlik uǵymyn jurttan jylý jinap, ózgeniń jaǵdaiyna alańdaý dep túsinbeý kerek. Tipti memlekettik mańyzy bar isterge erikti retinde paidańdy tigizýge bolady.
Darhan Quljambekovtyń negizi mamandyǵy – zańger. Alaida byltyr volonterlik qyzmetke alynyp, eldegi jemqorlyqpen kúresip júr. Memlekettik satyp alýdyń ádil ótýinen bastap, mektep, balabaqsha syndy áleýmettik nysandardyń qurylysyn qadaǵalaidy. Nátijesinde jyl basynan beri Darhan sekildi volonterler 14 mlrd teńge memleket qarjysyn ysyrap bolýdan saqtap qaldy.
Darhan Quljambekov, volonter: - Iaǵni bul jerde memlekettik organdar taýapr satyp alýda kóp jaǵdaida negizsiz baǵany kóterý derekteri bar. Bylai qaraǵanda memleket tarapynan qanshama qyrýar qarjy bólinip jatqannan keiin azamat retinde, elimniń janashyry retinde men erikti túrde osy jobaǵa kiristim.
Berik azamattyq ustanym men elge degen janashyrlyǵyn volonterlik ispen kórsetkisi kelgen azamattar aramyzda az emes. Olar jemqorlyq sekildi qoǵamdy jegi qurttai jegen dertpen birlese kúresýge bilek sybana kirisken. Bir ǵana elordanyń ózinde dál osyndai 60-tan astam elgezek azamat turady. Olar el úshin mańyzdy áleýmettik jobalarǵa qoǵamdyq baqylaý jasap, 750-den asa olqylyqty anyqtaǵan. Quzyrly organ belsendi azamattardyń arqasynda 500-den asa zań buzýshylyqty der kezinde joidyq dep otyr.
Jazira Jylqyshieva, QR Sybailas jemqorlyqqa qarsy is-qmiyl agenttigi Preventsiia qyzmetiniń asa mańyzdy ister jónindegi ofitseri: - 2 myń 400-den astam volonter bar, barlyǵynyń bazasy bar. Byltyr tamyz aiynan bastap jyldyń aiaǵyna deiin 4-5 aida úirettik, portaldy qalai monitoring jasaý kerektigin. óitkeni barlyǵy maman emes, kóp jaǵdaida estigen bilgenin aitady, al naqty olar monitoring jasaý úshin olardy úiretý kerek boldy. Bir jaǵynan volonterlerdiń ózine de paidasy tiedi. Birinshiden ózderiniń quqyqtyq saýatyn arttyryp jatyr. Jas mamandar bolsa, keleshegine jaqsy yqpalyn tigizedi dep oilaimyz.
Jeń ushynan jalǵasqan keselge jumyla kúsh biriktirip qana qarsy turýǵa bolady. Sondyqtan bul iske óz erkimen suranyp járdem jasaityn volonterlerdiń eńbegi erek. Kámelet jasynan asqan, buryn sottalmaǵan kez kelgen el turǵyny agenttik mamandaryna qolǵabys tanyta alady. Buǵan zań júzinde ruqsat bar.
