Úkimet otyrysynda QR Ekologiia, geologiia jáne tabiǵi resýrstar ministri Serikqali Brekeshev kanaldardy qalpyna keltirýge qansha qarajat kerek ekenin aitty, dep habarlaidy QazAqparat.
«Kanaldardy rekonstrýktsiialaý máselelerine toqtalsaq, búgingi kúni sýarý júiesinde uzyndyǵy 21,5 myń shaqyrym shamamen 3,5 myń magistraldyq jáne sharýashylyqaralyq kanal bar. Olardyń 55% (11,8 myń km) qanaǵattanarlyqsyz jaǵdaida. Bul sońǵy tutynýshylarǵa deiin sýdy tasymaldaý kezinde joǵary shyǵyndardyń negizgi sebebi bolyp otyr», - dedi Brekeshev.
Onyń aitýynsha, 2025-shi jylǵa deiin 7 oblysta uzyndyǵy 2,3 myń kilometr bolatyn 120 sýarý kanalyn kezeń-kezeńmen rekonstrýktsiialaý jáne qalpyna keltirý josparlanǵan. Bul 2025-shi jylǵa qarai sýarmaly alqapty 2,2 million gektarǵa deiin jetkizýge jáne sýarmaly sýdyń shyǵynyn jyl saiyn 800 million tekshe metrge tómendetýge múmkindik beredi.
«Oblystar bólinisinde rekonstrýktsiialaýdy qajet etetin kanaldardyń basym bóligi elimizdiń ońtústik óńirlerinde ornalasqan. Aldyn ala esepteýlerge sáikes, tolyq rekonstrýktsiialaýdyń jalpy quny 205 milliard teńgeni quraidy. Onyń ishinde jobalaý-smetalyq qujattamaǵa 6,8 milliard teńge qajet. Sondai-aq, 34 milliard teńge mólsherinde memlekettik-jekeshelik áriptestik arqyly biýdjetten tys qarajatty tartý josparlanýda», - dedi ministr.
Onyń sózine qaraǵanda, qazirgi ýaqytta 41 avariialyq sý qoimasy men gidrotehnikalyq qurylystardy (GTQ) rekonstrýktsiialaý júrgizilip jatyr. Sońǵy 5 jyl ishinde 15 joba paidalanýǵa berildi. Jeteýin kelesi jyldyń sońyna deiin, al qalǵan 19-yn 2025 jyldyń sońyna deiin tapsyrý josparlanyp otyr.
«Jasyl Qazaqstan» ulttyq jobasy aiasynda respýblikalyq biýdjetten jalpy quny 30 mlrd teńgeden 20 mlrd teńge (16 obekt) qoldaý tapty. Avariialyq qurylystardy qaita jańartýdy aiaqtaý úshin qosymsha 10 mlrd teńge mólsherinde qarajat qajet.
«Osy jobalardy iske asyrý nátijesinde sýdy 1,2 tekshe kilometrge deiin jinaqtaýǵa múmkindik týady jáne jalpy sany 300 myń adamy bar 40 eldi meken úshin sý tasqyny qaýpin qosymsha tómendetedi», - dedi vedomstvo basshysy.
