kollaj: Tengrinews.kz
Aqtóbede jantúrshigerlik oqiǵa boldy. Eriktiler ishimdikke qumar otbasynyń úiine baryp, 1 jasar bala qaitys bolǵanyn, onyń qasyndaǵy 4 jasar aǵasynyń ash qursaq júrgenin, sondai-aq, mas eresekterdi kórgen. Úidiń astan-kesteni shyqqan, isherge tamaq bolmaǵan, - dep habarlaidy Tengrinews.kz saity Diapazon basylymyna silteme jasap.
Erikti Ekaterina Golotina Zello Poisk komandasymen birge 4 jasar balany qutqaryp qalǵan. Biraq olar buǵan deiin de bul otbasyna barǵan. Qazanda Zello Poisk eriktiler tobyna osy otbasy týraly alǵashqy aryz túsken. Onda kishkentai balalar ishimdikke qumar ata-anasymen birge turatyny jáne olarǵa qaýip tónip turǵany aitylǵan.
"Sol jerge bardyq. Jaǵdai qorqynyshty boldy. Ata-anasy, atasy men ájesi mas bolyp shyqty. Olar bizge kúrek alyp júgirdi. Biz politsiia, jedel járdem jáne qamqorshylyq organdaryn shaqyrdyq. Olardy birinshi ret shaqyryp turmaǵan eken. 8 ailyq jáne 4 jastaǵy eki balany kórshisi tamaqtandyryp turǵan. Balalar aryq boldy, kózderiniń asty kógerip ketken, ash boldy. Anasy bizge kenjesi qospa jemeitinin, ony sýmen jáne qantpen tamaqtandyratynyn aitty. Onyń kóz aldynda balaǵa qospa berdik, al ol birden ishe bastady", - dedi Ekaterina Golotina.
Sol kezde balalardy "Úmit" balalar úiine alyp ketken, biraq olar ol jerde uzaq bolǵan joq. Eriktiler keiin kóp uzamai balalar otbasyna qaitarylǵanyn, otbasy mekenjaidy aitpai, kóship ketkenin bilgen.
Foto: diapazon.kz
Al aqpanda eriktiler kishkentai bala qaitys bolǵanyn bilgen.
"Osy otbasyndaǵy kishkentai bala qaitys bolǵanyn bildik. Biz mekenjaidy taýyp bardyq. Kórgenimiz qorqynyshty boldy, eki adam qan josa kúide ústel basynda otyrdy. Olar tóbelesken sekildi. Anasynyń qoly kesilgen. Ol bizge kishkentai balanyń pnevmoniiadan qaitys bolǵanyn aitty. Onyń denesi bólmede turdy. Qarny ash úlken bala jylap jatty. Biz barlyq quzyretti organdy shaqyrdyq. Vova qaitys bolǵannan keiin de eshkim bul otbasyna nazar aýdarmaǵany meni tańǵaldyrdy. Biz jaǵdaidy bilmesek, oǵan aralaspasaq, budan ári ne bolatynyn elestetý qorqynyshty. 4 jasar balany myna tozaqtan alyp bara jatqanda, ol inisin oiatyp, birge alyp ketýdi ótindi. Jantúrshigerlik jait. Kólikte bala tamaq berýimizdi ótindi. Júrekti aýyrtady. Quzyretti organdardyń qaida qarap otyrǵanyn, balalardy bulai qalai qaldyrýǵa bolatynyn túsinbeimin", - deidi ol.
Eriktiler áieldiń balasyn jerleýge ýaqyty bolmaǵanyna qapalanǵan.
"Olardyń bári mas boldy, jerleý rásimi kelesi kúnge aýystyryldy. Biraq kelesi kúni eshteńe ózgergen joq, qamqor adamdar jerledi. Ziratta ata-anasy bolǵan joq",- deidi ol.
Balalardyń quqyqtaryn qorǵaý, qorǵanshylyq, qamqorshylyq jáne arnaiy bilim berý bóliminiń basshysy Mira Nurǵalievanyń aitýynsha, 14 qazanda qamqorshylyq jáne qamqorshylyq organdarynyń mamandary politsiia bólimshesimen birlesip, "Úmit" balalar úiine anasynyń qaraýynsyz qalýyna bailanysty eki kámeletke tolmaǵan bala ornalastyrylǵan. Biraq balalardyń ákesi qorǵanshylyq jáne qamqorshylyq organdaryna balalardy qaitarý týraly ótinish jazǵan.
Al 20 qazanda ótinish qamqorshylar keńesinde qaraldy, qujattar tekserildi jáne qamqorshylar keńesiniń sheshimimen balalar ákesine qaitarylǵan.
"25 aqpanda bolǵan oqiǵadan keiin №3 politsiia bólimi 2018 jyly týǵan balany "Aiala" balalardy qoldaý ortalyǵyna ornalastyrdy. Kámeletke tolmaǵan balanyń ákesin ata-ana quqyǵynan aiyrý týraly máseleni Aqtóbe qalasy ákimi janyndaǵy kámeletke tolmaǵan balalardyń quqyqtaryn qorǵaý jónindegi komissiia qaraidy", - dedi Mira Nurǵalieva.
