Shyǵys Qazaqstan oblysynyń qutqarýshylary kópqabatty úi balkonynan qulaǵaly turǵan áieldi aman alyp qaldy dep habarlaidy "Ult aqparat".
«Búgin tańerteń erte «101» qyzmetine Óskemen qalasynyń Nazarbaev dańǵylynda ornalasqan úidiń úshinshi qabatynyń terezesinde áiel turǵany týraly qońyraý tústi. Qutqarýshylar oqiǵa ornyna jedel jetti. Ol kezde áiel balkonǵa ilinip, qulaýdyń az-aq aldynda turdy.
ShQO TJD mamandandyrylǵan jasaǵynyń qyzmetkeri Shyńǵys Smaǵulov 4-qabattan qutqarý arqanymen balkonǵa túsip, sońǵy sátte áieldi ustap qaldy. Sóitip, ony aqyryn tómen túsirdi.
Shyńǵys áreket etip jatqanda, qutqarýshylar men politsiia qyzmetkerleri tómennen kenepti sozyp, saqtandyryp turdy», - dep málim etti ShQO Tótenshe jaǵdailar departamentinen.
40 jastaǵy áiel jedel járdem qyzmetkerlerine tabystaldy. Qazir onyń ómirine qaýip tónip turǵan joq.
