Ótken jyly 31 myńnan astam qazaqstandyq qarjy piramidasynyń qurbany boldy. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Ótken jyly elimiz boiynsha 31 myńnan astam azamat qarjy piramidalarynan japa shekti. Olarǵa 54 mlrd teńgeden astam somaǵa zalal keldi. Búgingi tańda ishki ister organdarynyń óndirisinde osy sanattaǵy 65 qylmystyq is bar, 3 myńnan astam jábirlenýshi tanyldy. Tájiribe kórsetkendei, sońǵy jyldary qylmyskerlerdiń qyzmeti ekonomikalyq belsendiliktiń joǵarylaýymen, sondai-aq halyqtyń investitsiiaǵa qyzyǵýshylyq tanyta bastaýymen bailanysty. Suranys usynysty týdyrady», - dedi departament bastyǵy Ortalyq kommýnikatsiialar qyzmetindegi baspsóz máslihatynda.
Onyń atap ótýinshe, qarjy piramidalary búginde ózin ústeme investitsiia salasyndaǵy tabysty uiymdar retinde kórsetip otyr.
Ózderiniń jarnama kampaniialarynda olar «Innovatsiialyq joba», «tiimdiligi joǵary biznes», «biregei», «asa tiimdi», «tabysqa kepildik beremiz» syndy sózderdi paidalanady.
«Alaiaqtar zańdy mikroqarjylyq uiymdarmen, býkmekerlik keńselermen, tutyný kooperativterimen jáne jabyq investitsiialyq pai qorlarymen jasyryna alady. Qarjy piramidalaryn uiymdastyrýshylar onlain-tabys nemese joǵary tabysty onlain-jobany usyna otyryp, áleýmettik jelilerde belsendi jumys júrgizýde. Olar tanymal messendjerlerde chat ashady jáne qatysýshylardy túrli utys oiyndarymen, saýalnamalarmen jáne basqa da marketingtik amaldarmen tartady», - dedi Sanjar Ádilov.
