video kadry
Shymkentte kópbalaly jalǵyzbasty anaǵa úi syiǵa tartyldy. Úsh jyl buryn áiel kúieýinen aiyrylǵan. Osy ýaqyt boiy bes balasy bar ana ózi jumys istegen kafede turyp kelgen, - dep habarlaidy Tengrinews.kz portaly.
Kúieýi qaitys bolǵannan keiin Mariia Muhtasarova balalarymen kóshede qalǵan. Kópbalaly ana kafedegi kez kelgen jumysty istedi: eden jýyp, aspazǵa kómektesken. Áieldiń aitýynsha, qiyndyqtarǵa qaramastan, eshkimnen kómek suramaǵan, bárin ózi jeńýge tyrysqan.
Mariia Muhtasarovanyń ómirlik jaǵdaiy týraly "Dáýletten" qaiyrymdylyq qory bilgen. Eriktiler 21 million teńge jinap, kópbalaly anaǵa Shubarsý eldi mekeninen ádemi úi satyp alyp bergen.
"Baspanaly boldyq, óz úiimiz bar. Bizge kómektesken "Dáýletten" qoryna jáne qamqor adamdarǵa alǵysym sheksiz. Men óte qýanyshtymyn jáne tolqyp turmyn. Qýanyshymdy sózben aityp jetkizý múmkin emes. Úi maǵan qatty unady, taǵy da raqmet barshańyzǵa", – deidi kópbalaly ana Mariia.
Shubarsý aýylyndaǵy bes bólmeli úi 20 million teńge bolǵan. Qalǵan qarajat jihazdar men interer zattaryna jumsalǵan.
