Foto: ashyq derekkóz
Qazaqstan Respýblikasy Densaýlyq saqtaý ministrligi el aýmaǵynda zańsyz meditsinalyq qyzmet kórsetý men emdeý standarttarynyń buzylýyn anyqtaý maqsatynda jeke emshara kabinetterine júrgiziletin baqylaýdy kúsheitýde, dep habarlaidy Ult.kz.
Ministrlikke qarasty Meditsinalyq jáne farmatsevtikalyq baqylaý komitetiniń málimetinshe, júrgizilgen monitoring barysynda 1900 jeke emshara kabinetiniń 408-i tiisti litsenziiasyz jumys istegeni anyqtalǵan.
Tekserý nátijesinde 270 emshara kabineti óz qyzmetin erikti túrde toqtatty. Sonymen qatar, birqatar nysandar qyzmetin zańdastyrýǵa niet bildirip, ruqsat qujattaryn rásimdeýge kirisken. Taǵy 116 nysanǵa qatysty jospardan tys tekserýler bastalǵan.
Aiaqtalǵan tekserýler qorytyndysy boiynsha birqatar júieli zańbuzýshylyqtar tirkeldi. Atap aitqanda, meditsinalyq qyzmetti litsenziiasyz júzege asyrý, sanitariialyq talaptardy saqtamaý, dárilik zattardy durys saqtamaý, bilikti mamandardyń jetispeýi jáne shuǵyl kómek kórsetýge arnalǵan qajetti quraldardyń bolmaýy anyqtalǵan.
Baqylaý sharalary nátijesinde 147 ákimshilik hattama toltyrylyp, jalpy somasy 16 million teńgeden astam aiyppul salyndy.
Ministrlik ókilderi qabyldanyp jatqan sharalar eń aldymen patsientterdiń qaýipsizdigin qamtamasyz etýge, meditsinalyq qyzmet sapasyn arttyrýǵa jáne zań talaptarynyń saqtalýyn baqylaýǵa baǵyttalǵanyn atap ótti.
