Ázerbaijandaǵy qaýipsizdik ministrligi burynǵy basshysynyń balalary Ulybritaniiada birneshe záýlim ǵimarat, onyń ishinde quny 21 million dollar turatyn úi satyp alǵan. Bul týraly Organized Crime and Corruption Reporting uiymy, Finance Uncovered jobasy jáne Transparency International uiymy júrgizgen zertteý nátijesinde málim boldy.
Ázerbaijan prezidenti Ilham Áliev 2015 jyly ulttyq qaýipsizdik ministri Eldar Mahmýdovty sebebin túsindirmesten qyzmetinen bosatqan. 2019 jyly qarashada hakerler Kaiman araldarynyń Ulttyq banki klientteri jaily aqparatty qoldy etip, bar aqparatty kópshilikke jariia etken. Sondaǵy aqparatqa sáikes, Mahmýdovtar otbasy quny 111 million dollar bolatyn bines-imperiia qurǵan.
Zertteýshiler otbasy aktivteriniń jartysyna jýyǵy Mahmýdovtyń 26 jastaǵy uly Anar men 31 jastaǵy qyzy Nargizge qatysy bar kompaniialar arqyly satyp alynǵanyn áshkere qylǵan.
Zertteý avtorlary jyljymaityn múlik arasynda Pýl jáne Bornmýt qalalaryndaǵy quny 16,7 million dollar turatyn keńse ǵimarattaryn anyqtaǵan. Buǵan qosa Londonnyń Naitsbridj aýdanyndaǵy tórt qabatty ǵimarat Anar Mahmýdovqa tiesili ekeni belgili bolǵan. Ǵimarat quny - 21 million dollar.
2018 jyly Londonda 10 jyl turǵan Mahmýdovtyń enesi – Zamira Hadjieva, áigili Harrods saýda úiinen osy jyldar aralyǵynda 21 million dollarǵa saýda jasaǵany habarlanǵan. London biligi 55 jastaǵy Hadjieva aqshanyń qaidan kelgenin túsindirýin mindettep, múlkin tárkilegen. Biyl aqpanda Hadjieva bul iske qatysty appeliatsiialyq sotta jeńilip qaldy. Endi ol aqshasy qaidan kelgenin dáleldeýi tiis.
Finance Uncovered basylymyna suqbat bergen Anar men Nargiz Mahmýdovtardyń advokaty otbasynyń bailyǵy 19 ǵasyrda eńbek etip, tabysty bolǵan atalarynyń biri Aslan Ashýrovtan qalǵan dep túsindirgen. Zańgerlerdiń sózinshe, barlyq aktivter zańdy túrde tirkelgen.
Zertteý avtorlary Mahmýdovtar otbasynyń Ispaniia, Liýksembýrg jáne Litva elderinde de birneshe kompaniiasy men jyljymaityn múlki baryn aitady.
