2023 jyly elorda tolyqtai gazdandyrylady. Bul týraly qala ákimi Altai Kólginov aitty, dep habarlaidy QazAqparat.
«Endi gazdandyrý máselesine toqtalyp óteiin. Gazdandyrý – bul Elbasynyń tarihi jobasy ári Memleket basshysynyń erekshe baqylaýynda tur. 2020 jyly 320 shaqyrym ishki gaz taratý jelisin tósedik. Biyl 317 shaqyrymǵa tósep jatyrmyz. Jumys qarqyndy júrgizilýde. 7 turǵyn úi alabyn gazdandyrý qarqyn alǵan. Olar: Kóktal-1, Kóktal-2, Agroqalashyq, Jeleznodorojnyi, Kirpichnyi, Óndiris, Kúigenjar, Internatsionalnyi, Ońtústik-shyǵys, Esildiń oń jáne sol jaǵalaýy», - dedi ol Nur-Sultan qalalyq máslihatynyń kezekten tys sessiiasynda.
Onyń atap ótýinshe, bul jumys birneshe kezeńmen júrgiziledi. Jumystardyń qorytyndy kezeńi 2023 jylǵa josparlanǵan.
«Bul jait ekologiianyń jaqsarýyna aitarlyqtai yqpalyn tigizedi. 1 jyldyń ishinde barlyq turǵyn úi alabyna gaz tarta almaitynymyzdy túsinýimiz qajet. Degenmen, gazǵa qosý úshin árbir turǵyn úimen qarqyndy jumys istep jatyrmyz. Bul da aýqymdy jumys, basym bóligi dál osy turǵyn úi alabtaryna tiesili. Gaz tartylǵannan keiin abattandyrý, joldardy jóndeý jáne salý qajet bolatyndyǵy da sózsiz», - dedi Altai Kólginov.
