2023 jyldan bastap jumys berýshiler óz esebinen 5% zeinetaqy jarnasyn aýdarýǵa tiis, dep habarlaidy QazAqparat.
Eńbek jáne halyqty áleýmettik qorǵaý ministrligi zeinetaqy júiesin odan ári jańǵyrtýdyń 2030 jylǵa deiingi tujyrymdamasyna túzetýler ázirledi.
Osy jańǵyrtýdyń taǵy bir mańyzdy baǵyty - 2023 jyldan bastap jumys berýshilerdiń 5% mindetti zeinetaqy jarnasyn engizý.
Jumys berýshiler óz qarajaty esebinen óz jumyskerleriniń paidasyna jumyskerdiń tabysynan mindetti 5% zeinetaqy jarnasyn aýdarady.
Memleket basshysy JBMZJ maqsatyn shartty-jinaqtaýshy quramdaýyshty qalyptastyrýdan azamattardyń jeke zeinetaqy jinaqtaryn tolyqtyrýǵa ózgertý, sondai-aq keiinnen olardy áleýmettik muqtajdyqqa paidalaný quqyǵyn bere otyryp, mindetti zeinetaqy jarnalary, mindetti kásiptik zeinetaqy jarnalary jáne JBMZJ esebinen qalyptastyrylǵan zeinetaqy jinaqtarynyń bir bóligimen tolyqtyrý (salymshynyń tańdaýy boiynsha) arqyly Biryńǵai jinaqtaýshy zeinetaqy qorynda jeke nysanaly shottardy engizý jónindegi tásilderdi maquldady.
QR Salyq kodeksiniń sheńberinde jumys berýshilerge júktemeni tómendetý úshin engiziletin JBMZJ shegerimderine jatqyzý bóliginde jeńildikter berilgenin atap ótý qajet.
Búgingi tańda Biryńǵai jinaqtaýshy zeinetaqy qorynan tólenetin zeinetaqy tólemderi zeinetaqy tólemderiniń mólsherin esepteýdi júzege asyrý ádistemesine sáikes esepteledi.
Ziiandy óndiristerde jumys isteitin qyzmetkerler úshin jáne eger múgedektigi merzimsiz bolyp belgilense, birinshi jáne ekinshi toptardaǵy múgedektigi bar zeinetaqy tólemderin alýshylar úshin zeinetaqy jinaqtarynyń aǵymdaǵy qunynyń jekelegen koeffitsientteri engizildi.
«Tujyrymdamaǵa túzetýler aiasynda eńbek jaǵdailary ziiandy jumystarmen ainalysatyn qyzmetkerlerge qatysty ólim-jitimniń jekelegen koeffitsientterin paidalaný máselesi qarastyrylýda, olardy ómir boiǵy zeinetaqy annýitetiniń qunyn esepteý kezinde qoldaný josparlanyp otyr. Bul jańashyldyq ziiandy eńbek jaǵdailarynda jumys isteitin azamattar úshin zeinetaqy annýitetin resimdeý múmkindigin neǵurlym qoljetimdi etedi», – deidi Eńbekminniń áleýmettik saqtandyrý, bazalyq áleýmettik jáne zeinetaqymen qamsyzdandyrý saiasaty departamentiniń direktory Viktoriia Shegai.
Tabysty zeinetaqy tólemderimen almastyrý deńgeiin saqtaý úshin zeinetaqy jinaqtaryn merziminen buryn alýdyń parametrleri men sharttaryn jetildirý jónindegi jumys jalǵasady.
Tujyrymdamada usynylǵan sharalar bolashaq alýshylardyń zeinetaqysynyń mólsherin olardyń eńbek ótiline barabar qamtamasyz etýge, zeinetaqy tólemderiniń «satyp alý» qabiletin jáne joǵalǵan tabysty almastyrýdyń halyqaralyq zeinetaqymen qamsyzdandyrý standarttaryna sáikes keletin deńgeiin saqtaýǵa múmkindik beredi.
Qazirgi ýaqytta «Qazaqstan Respýblikasynyń zeinetaqy júiesin odan ári jańǵyrtýdyń 2030 jylǵa deiingi tujyrymdamasy týraly» Qazaqstan Respýblikasy Prezidentiniń 2014 jylǵy 18 maýsymdaǵy № 841 Jarlyǵyna ózgerister men tolyqtyrýlar engizý týraly» Qazaqstan Respýblikasynyń Prezidenti Jarlyǵynyń jobasy týraly» QR Úkimeti qaýlysynyń jobasy múddeli memlekettik organdarmen kelisiledi.
