2022 jylǵy 1 qańtardan bastap pedofilderge elektrondyq bilezik taǵylady. Bul týraly Májilistegi Úkimet saǵatynda QR Ishki ister ministri Erlan Turǵymbaev aitty, dep habarlaidy QazAqparat tilshisi.
«Probatsiialyq baqylaýdy damytý úshin elektrondyq bilezikter engizilýde. Biyl biz bul jumysty ilki joba retinde bastaimyz. Birinshi kezekte 2022 jylǵy 1 qańtardan bastap pedofilderge qatysty qoldanylady», - dedi Erlan Turǵymbaev.
Sonymen qatar ol sybailas jemqorlyqqa qarsy naqty is-sharalar qabyldanǵanyn aitty.
«Jemqorlyqty joiý úshin azamattarmen tikelei bailanys azaidy. Kólik júrgizý kýáligin berý jáne emtihan qabyldaý fýnktsiialary «Azamattarǵa arnalǵan úkimet» memlekettik korporatsiiasyna berildi. Tirkeý-emtihan ortalyqtary joiyldy. Politsiia qyzmetkerleri kólik quraldarynyń kriminaldyq tarihyn ǵana tekseredi. Qazaqstanda 30 táýlikke deiin bolatyn shetel azamattaryn tirkeý toqtatyldy. Elektrondyq vizalar engizildi. Tikelei halyqaralyq áýejailarǵa kirý vizalaryn berý uiymdastyryldy», - dedi ministr.
Erlan Turǵymbaev kóshi-qon salasyndaǵy keibir qyzmet Eńbek jáne áleýmettik qorǵaý ministrligine berilgenin atap ótti.
«Qala syrtyndaǵy «Shep» statsionarlyq beketteriniń sany 36-dan 6-ǵa deiin qysqardy. Olar tek shekaralas aýdandarda qaldy. Jol qozǵalysyn qadaǵalaý arnaiy baqylaý júieleri arqyly bailanyssyz ádispen júzege asyrylady. Barlyq patrýldik qyzmetkerler beinetirkegishpen jabdyqtalǵan», - dedi ol.
