«20 jyl quldyqta boldym» dep jelini shýlatqan reseilik politsiia qyzmetkerlerine nege jalǵan video túsirgenin túsindirdi, dep habarlaidy QazAqparat.
«20 jyl boiy Qazaqstandaǵy sharýa qojalyqta erkimnen jumysqa jegildim» dep jelini shýlatqan reseilik politsiia qyzmetkerleri men Resei Federatsiiasy konsýldyǵynyń ókilderine shynyn aitty. Bul týraly Polisia.kz saity jazdy.
«Áleýmettik jelige monitoring jasaý kezinde ózin Resei Federatsiiasynyń azamaty Aleksei Aleksandrovich Kotovpyn dep tanystyrǵan er adamnyń beine úndeýi tabyldy. Videoda ol Qaraǵandy oblysynyń aýmaǵynda erkinen tys ómir súrip jatqanyn aitqan. Jelige taraǵan aqparat boiynsha qylmystyq is tirkelip, oqiǵanyń mán-jaiyn tekserý úshin Shet aýdanyndaǵy sharýa qojalyǵyna jedel-tergeý toby bardy. Qojalyq iesi men Aleksei Kotovtan Resei Federatsiiasy konsýldyǵy qyzmetkerleriniń kózinshe jaýap alyndy», - dep jazady Polisia.kz.
Saittaǵy málimetke sensek, Kotov sharýa qojalyq aýmaǵynda óz erkimen jumys istegen jáne qolynda uialy telefony bolǵan.
«Ol qalaǵan ýaqytynda fermadan ketýge múmkindigi bolǵanyn moiyndady. Reseilik azamat sharýa qojalyǵynyń iesiniń ústinen jazǵan aryzynan bas tartyp, oǵan eshqandai shaǵymy joq ekenin túsindirdi. Video jazǵandaǵy jalǵyz maqsaty úige oralý bolǵan», - delingen saittyń málimetinde.
