Videodan skrinshot
Almatyda alaiaqtardyń qurbany bolǵan 71 jastaǵy zeinetker 20 million teńgesinen aiyrylyp qana qoimai, óz páterin de satyp jiberýge májbúr bolǵan, dep habarlaidy Ult.kz KTK arnasyna silteme jasap.
Oqiǵa ótken jyly bastalǵan. Buryn ýniversitette muǵalim bolyp jumys istegen Jannat Koshikovaǵa aldymen burynǵy áriptesi habarlama jazǵan. Artynsha ózin ýniversitettiń zańgerimin dep tanystyrǵan adam qońyraý shalyp, oqý ornynyń derekqory buzylǵanyn aitqan.
Kóp uzamai zeinetkerge ózin Ishki ister ministrliginiń podpolkovnigimin dep tanystyrǵan belgisiz adam habarlasyp, «depozitterińizge qaýip tónip tur» dep qorqytqan. Alaiaqtar áieldi barlyq aqshasyn «qaýipsiz shotqa» aýdarý kerek dep sendirgen.
Zeinetker olardyń aitqanyna senip, bankten shamamen 20 million teńgeni sheship alyp, kórsetilgen shottarǵa aýdarǵan. Biraq alaiaqtar munymen toqtamai, ony nesie alýǵa da kóndirgen.
Eń soraqysy – alaiaqtar zeinetkerdi óz páterin de satýǵa májbúr etken. Olar «páterińiz alaiaqtardyń qolyna ótip ketpes úshin tez arada satyp jiberý kerek» dep sendirgen. Tipti rieltor men notariýsty da ózderi taýyp bergen.
Páter naryqtyq baǵadan tómen – 45 million teńgege satylyp ketken. Al zeinetker alǵan aqshasyn da alaiaqtarǵa berip qoiǵan.
Tek týystary aralasqanda ǵana áiel aldanǵanyn túsingen. Qazir zeinetkerdiń týystary politsiiaǵa shaǵym túsirgen. Tergeý bastalǵanymen, úidiń jańa iesi páterdi bosatýdy talap etip otyr.
Advokattyń aitýynsha, zeinetker áleýmettik jaǵynan osal topqa jatady jáne ony jylytý maýsymynda úiden shyǵarý zańsyz. Alaida sot páterden shyǵarý týraly sheshim shyǵarǵan. Qazir qorǵaýshy Joǵarǵy sotqa shaǵymdanýǵa daiyndalyp jatyr.
Qylmystyq is «asa iri kólemdegi alaiaqtyq» baby boiynsha qozǵalǵan. Alaida alaiaqtardy tabý men joǵalǵan aqshany qaitarý múmkindigi óte az ekeni aityldy.
