Jyl basynan «Azamattarǵa arnalǵan úkimet» memlekettik korporatsiiasy elimizdiń aýyldyq eldi mekender turǵyndaryna memlekettik qyzmetterdi alý jáne tsifrlyq servisterdi paidalaný boiynsha oqytý jumystaryn júrgizdi. Bir jarym ai ishinde elimizdiń túrli óńirlerinen 18 myńnan astam azamat oqýdan ótti, dep habarlaidy ult.kz.
Korporatsiianyń baspasóz qyzmetiniń málimetinshe, Qazaqstan Respýblikasynda jariialanǵan Tsifrlandyrý jáne jasandy intellekt jyly aiasynda júzege asyrylyp jatqan bul bastama halyqtyń tsifrlyq saýattylyǵyn arttyrýǵa, memlekettik qyzmetterdiń qoljetimdiligin keńeitýge jáne olardy onlain formatta óz betinshe alý daǵdylaryn qalyptastyrýǵa baǵyttalǵan. Óńirler arasynda Qostanai, Soltústik Qazaqstan, Jambyl jáne Almaty oblystarynda oqytylǵan azamattar sany basym.
Oqý sabaqtaryn «Azamattarǵa arnalǵan úkimet» memlekettik korporatsiiasynyń mamandary elimizdiń ár óńirindegi aýyldyq okrýgter men eldi mekenderde ótkizdi.
Sonymen qatar, jyl basynan beri «Tanym» korporativtik oqý ortalyǵynyń qatysýymen oblys ortalyqtarynda 5 myńǵa jýyq azamat oqytýdan ótti. Sabaq barysynda azamattar memlekettik qyzmetterdi onlain rejimde alý tártibin, sondai-aq memlekettik tsifrlyq infraqurylymnyń negizgi quraldary men múmkindikterin meńgerdi.
Eske sala keteiik, elektrondyq memlekettik qyzmetterdi jáne zamanaýi onlain-servisterdi paidalanýdy tegin úirengisi keletin azamattar úshin elimizdiń ár oblys ortalyǵynda oqý synyptary jumys isteidi. Sabaqtar sársenbi jáne juma kúnderi saǵat 10:00-den 12:00-ge deiin ótkiziledi.
