QR Premer-Ministri Asqar Maminniń tóraǵalyǵymen ótken memlekettik komissiia otyrysynda qalyptasqan epidemiologiialyq jaǵdaidy eskere otyryp, karantin sharalaryn kezeń-kezeńimen alyp tastaý jospary qaraldy. Bul týraly "Ult aqparat" primeminister.kz silteme jasap habarlaidy.
Elimizdegi sanitarlyq-epidemiologiialyq jaǵdai, shekteý sharalaryn jeńildetý jónindegi usynystar, óńirler men kásipkerlik sýbektileriniń qyzmetti qaita bastaýǵa daiyndyǵy týraly densaýlyq saqtaý ministri A. Tsoi, Nur-Sultan qalasynyń ákimi A. Kólginov, Almaty qalasynyń ákimi B. Saǵyntaev, Qaraǵandy oblysynyń ákimi J. Qasymbek, Túrkistan oblysynyń ákimi Ó. Shókeev, Atyraý oblysynyń ákimi M. Dosmuhambetov, «Atameken» UKP basqarma tóraǵasy A. Myrzahmetov jáne t. b. baiandady. Qazaqstanda karantin sharalary kúshine engizilgen kezeńde epidemiologiialyq ahýal turaqtandyrylyp, meditsinalyq uiymdardyń júktemesi aitarlyqtai tómendetildi. Virýsty juqtyrýdyń táýliktik ósimi 4%-dan 0,5%-ǵa deiin tómendedi. Saýyǵyp shyqqan adamdar sany 76%-ǵa jetti. Reprodýktivtiliktiń ortasha kórsetkishi 0,78-ge deiin tómendedi, tósek oryndarynyń júktemesi 26%-dy quraidy.
Memlekettik komissiia óńirlerdiń ákimderiniń usynystaryn, sondai-aq Densaýlyq saqtaý ministrligi men basqa da vedomstvolardyń ustanymyn eskere otyryp, Karantin sharalaryn kezeń-kezeńimen alyp tastaý josparyn bekitti jáne birqatar sheshim qabyldady:
1. 2020 jylǵy 17 tamyzdan bastap barlyq óńirlerde jumysyn qaita bastaityn kásipkerlik sýbektileriniń qyzmet túrleriniń tizbesi bekitildi: SOSO, saýda úileri (býtikter), saýda jelileri, jabyq bazarlar (tolymdylyǵy 30%-dan aspaýy tiis, 1 kelýshige 4 sh. m); sulýlyq salondary, shashtaraz, SPA ortalyqtary, kosmetologiialyq qyzmet kórsetetin nysandar (aldyn ala jazylý boiynsha 1 kelýshige 4 sh.m.); basseini joq fitnes ortalyqtary (tolymdylyǵy 50%-dan aspaýy tiis, 1 kelýshige 5 sh.m.), basseini joq monshalar men saýnalar (tolymdylyǵy 50%-dan aspaýy tiis, 1 kelýshige 4 sh.m.); balalarǵa arnalǵan túzetý kabinetteri, balalar jáne eresekterge bilim berý ortalyqtary (toptarda — 5 adamnan artyq emes, jazylý boiynsha); mektepke deiingi balalar mekemeleriniń kezekshi toptary (15 adamnan artyq emes); ashyq aýadaǵy attraktsiondar (qashyqtyqty saqtaý, maska taǵy, adamdar aǵynyn retteý). Jumys berýshilerge qyzmetkerlerdiń keminde 80% úshin qashyqtan jumys isteý formatyn saqtaý usynylady.
2. 2020 jylǵy 17 tamyzdan bastap ashyq aýada jeke jáne toptyq jattyǵýlar jasaýǵa (5 adamnan artyq emes) jáne ulttyq qurama, klýb komandalary úshin sporttyq jattyǵýlar jasaýǵa (30 adamnan artyq emes, sport bazalarynda turý, epidemiiaǵa qarsy sharalardy jáne aldyn alý sharalaryn saqtaý) ruqsat etiledi.
3. Biylǵy 17 tamyzdan bastap qoǵamdyq kólikter sońǵy aialdamada dezinfektsiialaý men jeldetýdi qamtamasyz etýmen, otyrǵyzý oryndarynyń tolýyna qarai júre bastaidy.
4. Salynǵan tyiym saqtalady: oiyn-saýyq, sporttyq, otbasylyq, estelik, saltanatty jáne basqa da buqaralyq is-sharalardy ótkizýge, sonymen qatar úide ótkizýge; barlardyń, túngi jáne oiyn klýbtarynyń, karaoke, fýdkorttardyń, kinoteatrlardyń jáne balalar men eresekterge arnalǵan basqa da oiyn-saýyq oryndarynyń jumysyna; mádeniet nysandarynyń, mýzeilerdiń qyzmetine, konferentsiialar, kórmeler, forýmdar ótkizýge; basseinder, qalalyq jáne qoǵamdyq jaǵajailar, ashyq akvaparkterdiń jumysyna; dini nysandardyń jumysyna; qala mańyndaǵy jolaýshylar poiyzdarynyń/elektrichkalardyń qozǵalysyna, jumys poiyzdaryn, qalaaralyq avtobýstardy/mikroavtobýstardy qospaǵanda, ortaq vagondardy qurýǵa.
5. Epidemiologiialyq jaǵdaidy odan ári turaqtandyrý maqsatynda demalys kúnderi shekteý sharalary saqtalady.
«Maska rejimi men áleýmettik qashyqtyqty saqtaý ‒ barlyq adamdar úshin saqtalýy tiis mindetti sanitarlyq talaptar jáne bul azamattardyń kúndelikti ómirindegi erejelerge ainalýy qajet. Biznes sýbektileriniń qyzmetin olar tolyq daiyn bolǵan jaǵdaida ǵana qaita bastaý qajet», — dedi Úkimet basshysy.
Eske salsaq, Qazaqstanda shilde aiynyń ortasynda eki aptaǵa sozylatyn karantin engizilgen bolatyn. 29 shildede Memleket basshysy Qasym-Jomart Toqaev epidemiologiialyq ahýaldy turaqtandyrý jóninde keńes ótkizip, karantin sharalaryn taǵy eki aptaǵa uzartýdy tapsyrǵan edi.
