Astanada azamattardyń jeke jáne banktik derekterin urlaýǵa baǵyttalǵan iri fishingtik shema áshkerelendi. Qylmystyq top nebári tórt kúnniń ishinde Beeline, Kcell jáne Activ abonentterine shamamen 150 myń alaiaqtyq SMS taratqan, dep habarlaidy ult.kz.
Astana prokýratýrasynyń úilestirýimen júrgizilgen jedel-tergeý sharalary nátijesinde kúdiktilerdiń áreketi toqtatyldy.
Tergeý málimetinshe, qylmystyq shema biyl qańtarda uiymdastyrylǵan. Ońtústik-Shyǵys Aziia elderiniń biriniń azamaty Qazaqstanda zańsyz qyzmet jolǵa qoiý úshin jergilikti turǵynǵa aqsha usynǵan. Keiin arnaiy jabdyqtyń jumysyn qamtamasyz etken ózge adamdar da topqa qosylǵan.
Kúdiktiler uialy bailanys bazalyq stantsiiasynyń jumysyn imitatsiialaityn «SMS-blaster» qurylǵysyn paidalanǵan. Osy arqyly olar bailanys operatorlarynyń súzgileý júielerin ainalyp ótip, myńdaǵan abonentke jappai habarlama jibergen.
Jalǵan SMS-ter belgili kompaniialardyń atynan taratylyp, azamattarǵa túrli bonýs pen jeńildikter usynylǵan. Habarlamadaǵy siltemege ótkender kompaniianyń resmi saityna uqsatyp jasalǵan jalǵan resýrsqa túsken. Onda jeke jáne banktik derekterdi, sonyń ishinde karta nómirin, CVV kodyn jáne SMS arqyly kelgen rastaý kodyn engizý talap etilgen.
Osylaisha, alaiaqtar azamattardyń qupiia derekterine qol jetkizip, bank shottaryndaǵy qarajatyn iemdenýge áreket jasaǵan.
Qarjylyq monitoring agenttiginiń qyzmetkerleri operatsiia barysynda «SMS-blaster» qurylǵysyn tárkiledi. Saraptama onyń aqparatty jasyryn alýǵa arnalǵan arnaiy tehnikalyq qural ekenin anyqtaǵan.
Atalǵan fakti boiynsha QR Qylmystyq kodeksiniń 399-baby 2-bóligimen qylmystyq is qozǵaldy. Qazirgi ýaqytta tórt kúdikti qamaýda otyr. Sotqa deiingi tergeý jalǵasyp jatyr.
Tergeý múddesine bailanysty istiń ózge derekteri ázirge jariialanbaidy.
