Foto: e-history.kz
Búgin – qazaq jastary úshin erekshe kún. 15 sáýir elimizde Qozy Kórpesh – Baian Sulý kúni, iaǵni Ulttyq ǵashyqtar kúni retinde atalyp ótedi, dep habarlaidy Ult.kz.
Bul mereke 2011 jyldan bastap keńinen tanymal bola bastady. Ol Batystan engen Áýlie Valentin kúnine balama retinde usynylǵan. Al bul ideiany alǵash ret 1999 jyly qoǵam qairatkeri Darhan Myńbai kótergen.
Qazir bul kún resmi túrde bekitilmese de, jastar arasynda keńinen toilanady. Ǵashyqtar bir-birin quttyqtap, syilyqtar jasap, túrli merekelik sharalar uiymdastyrady.
Qozy Kórpesh – Baian Sulý – qazaq halqynyń eń kórnekti liro-epostyq jyrlarynyń biri. Bul týyndy XIII–XIV ǵasyrlardan beri aitylyp, XIX ǵasyrda qaǵazǵa túsirilgen.
Jyrda bir-birine qosyla almaǵan qos ǵashyqtyń qaiǵyly taǵdyry baiandalady. Qozy men Baian mahabbat jolynda talai synaqtan ótedi. Alaida zulym Qodardyń kesirinen Qozy qaza tabady. Súiiktisinen aiyrylǵan Baian kek alyp, sońynda óz ómirin de qurban etedi.
Olardyń mahabbaty – adaldyqtyń, tazalyqtyń jáne qurbandyqtyń simvoly retinde halyq jadynda máńgi saqtalǵan.
Qozy men Baianǵa arnalǵan kesene Qozy Kórpesh – Baian Sulý mazary elimizdiń shyǵysyndaǵy Aiagóz óńirinde ornalasqan. Biiktigi shamamen 12 metr bolatyn bul tarihi eskertkish ǵasyrlar boiy saqtalyp keledi.
1982 jyly kesene memleket qorǵaýyna alynyp, tarihi-mádeni muralar tizimine engizildi. Al 2013 jyly Aiagóz qalasynda qos ǵashyqqa arnap eskertkish ornatyldy.
Búgingi kún – tek mahabbat merekesi ǵana emes, ulttyq qundylyqtar men shynaiy sezimniń qadirin eske salatyn erekshe data.
