Foto: azattyq-ruhy.kz
Semei qalasynyń turǵyndaryna aýylǵa kóshý usynylýda. Osy maqsatta jergilikti bilik «Qaladan – aýylǵa» atty pilottyq jobany iske qosty, dep habarlaidy Ult.kz «24KZ» telearnasyna silteme jasap.
Jobanyń negizgi maqsaty – aýyldyq aýmaqtardy damytý, kadr tapshylyǵyn azaitý jáne shalǵai eldi mekenderge qala turǵyndaryn tartý.
Qalanyń qarbalas tirshiligin aýyldyń tynysh ómirine aýystyrǵysy keletinderge ákimdik tarapynan qoldaý kórsetiledi.
Otbasylarǵa bastapqy jarna retinde 1,5 million teńgege deiin qarajat bólinedi, sondai-aq kásip ashýǵa nemese mal sharýashylyǵymen ainalysýǵa kómek beriledi. Kásipkerlerge 6 paiyzdyq mólsherlememen 10 jylǵa deiingi merzimge jeńildetilgen nesie men granttar qarastyrylǵan.
Erkebulan Keńesbekuly, Abai aýdany Medeý aýyldyq okrýginiń ákimi:
"Biz mektep jasyndaǵy balalary bar otbasylardy shaqyramyz. Olarǵa baspana, 10 siyr jáne bir jylqy beremiz. Turaqty jumyspen qamtamasyz etemiz".
Nurlan Nazarhanov, Kókpekti aýdany Shuǵylbai aýyldyq okrýginiń ákimi:
"Jer resýrstary jetkilikti. Eńbek etýge nietti azamattarǵa qajetti qoldaý kórsetemiz. Ótken jyly bizge eki otbasy kóship keldi. Bul – sońǵy 10 jylda jańa turǵyndar bolmaǵanyn eskersek, úlken oqiǵa".
Búginde Abai oblysy aýmaǵynda 600 myńnan astam adam turady, onyń 222 myńy aýyldyq jerde ómir súredi. Bilik ókilderi bul baǵytta ósim áleýeti joǵary dep sanaidy. Jobanyń mindeti – aýyl halqynyń sanyn saqtap qana qoimai, ony arttyrý jáne aýyldy kóshýge tartymdy etý.
Berik Ýáli, Abai oblysynyń ákimi:
"Aýyldardyń damý áleýetin arttyryp, aýyl turǵyndarynyń ómir sapasyn jaqsartý jáne eldi mekenderdi jańǵyrtý qajet. Mindetter aýqymdy, biraq bizde resýrstar da, ortaq nátijege umtylys ta bar".
«Qaladan – aýylǵa» jobasy 2028 jylǵa deiin júzege asyrylady. Bilik aýyl ekonomikasyn nyǵaityp, jańa jumys oryndaryn ashýdy kózdep otyr. Aýdan ákimderine bastamany is júzinde tiimdi iske asyrý mindeti júktelgen.
