Áleýmettik jelilerde búgin soǵys qimyldary júrip jatqan aimaqtan 14 qazaqstandyq shyǵarylyp, Qazaqstannyń Reseidegi elshiligine jetkiziledi degen aqparat tarady. Syrtqy ister ministrligi bul málimetti joqqa shyǵardy, dep habarlaidy ult.kz.
Bul týraly SIM resmi ókili Janbolat Úsenov Telegram-arnasynda málimdedi.
Onyń aitýynsha, azamattardyń elge qaitarylýyna qatysty kelissózder Resei tarapymen ártúrli deńgeide jalǵasyp jatyr. Másele ministrliktiń turaqty baqylaýynda.
«Tekserilmegen málimetterdi taratýǵa jol bermeý kerek. Mundai aqparat jaqyndarynan habar kútip otyrǵan otbasylardy adastyryp, negizsiz úmit týdyrýy múmkin», – dedi Úsenov.
Ministrlik azamattar men BAQ ókilderin aqparatty tek resmi derekkózderden alýǵa shaqyrdy.
Buǵan deiin SIM soǵys qimyldary aimaǵynda júrgen qazaqstandyqtardyń ótinishteri boiynsha jumys júrgizilip jatqanyn jáne olardy elge qaitarý máselesi boiynsha kelissózder jalǵasyp jatqanyn habarlaǵan.
