AQSh-tyń Las-Vegas qalasynda 33 jastaǵy áiel birneshe er adammen jalǵan nekege turyp, olardy iri kólemde qarjyǵa aldaǵanyn moiyndady, dep habarlaidy ult.kz.
Tergeý málimetinshe, Tsziain Chen áleýmettik jeliler arqyly er adamdarmen tanysyp, keiin olarmen resmi nekege otyrǵan. Biraz ýaqyt ótken soń Qytaidaǵy aýyr naýqas týystaryna kómek qajet ekenin aityp, kúieýlerinen aqsha suraǵan. Qarajatty alǵannan keiin olarmen bailanysyn úzgen.
Quqyq qorǵaý organdarynyń deregine sáikes, 2019 jyldyń naýryzynan 2024 jyldyń mamyryna deiin Chen Klark okrýginde jeti neke kýáligin rásimdegen. Keiin ol alaiaqtyq jáne eki adammen qatar nekede boldy degen kúdikpen ustalǵanymen, kelý týraly mindetteme alyp bostandyqqa shyqqan. Alaida artynsha quqyq qorǵaý organdarynan boi tasalap ketken.
Keiin áiel Las-Vegasta qaita qolǵa túsken. Tergeý barysynda onyń bul joly Viki Lian degen jalǵan esimdi paidalanyp, taǵy jeti er adammen nekege turǵany belgili boldy. Osylaisha onyń jalǵan nekeleriniń jalpy sany keminde 14-ke jetken.
Jábirlenýshilerdiń biri áieldiń ótinishi boiynsha «naýqas týysyna kómek kórsetý» úshin oǵan 23 myń dollar aýdarǵan. Alaida eki aptadan keiin Chen birge turǵysy kelmeitinin aityp, bailanysyn úzgen.
Taǵy bir azamat áieldiń ortaq úi satyp alý týraly usynysyna senip, shamamen 30 myń dollar bergen. Keiin ol da áielmen bailanysa almai qalǵan.
Tergeý kezinde Tsziain Chen jalǵan nekelerdi ádeii Las-Vegasta tirkegenin moiyndaǵan. Onyń sózinshe, bul qalada nekege turý rásimi basqa óńirlerge qaraǵanda jeńil júzege asady.
Sondai-aq tergeýshiler sońǵy bir jyldyń ishinde áieldiń Las-Vegastaǵy áigili Wynn kazinosynda 300 myń dollardan astam qarjyny qumar oiynǵa utylǵanyn anyqtady. Bastapqyda «týystaryna kómek qajet» dep jinalǵan aqshanyń basym bóligi dál osy qumar oiyndarǵa jumsalǵan.
Osy aptada Tsziain Chen eki adammen qatar nekede bolý jáne 100 myń dollardan astam qarjyny alaiaqtyq jolmen iemdený boiynsha taǵylǵan aiyptardy tolyq moiyndady. Sot úkimi 20 tamyzda jariialanady.
