Chempiondarymyz Olimpiadaǵa qatyspasa da, medal alamyz. Bul týraly aýyr atletikadan Qazaqstan ulttyq quramasynyń bas bapkeri Aleksei Ni Riodaǵy QazAqparat tilshisine bergen suhbatynda málim etti.
«Chempiondarymyz (Ilia Ilin, Zúlfiia Chinshanlo, Maiia Maneza, Svetlana Podobedova - agenttik) Olimpiadaǵa qatyspasa da, medal alamyz. Búgingi Rioǵa kelgen quramamyz da jaman emes. Eń bastysy sportshylarymyz jarysqa deiin jattyǵý kezinde jaraqat alyp qalmasa boldy. Londonda 4 altyn alǵan chempiondarymyzdyń Rioǵa kele almaǵany árine ókinishti. Bul joly basqa atletterimiz medal áperedi. Burynǵy myqtylary joq eken dep aýyr atletterdi nazardan shyǵarýǵa bolmaidy», - dep atap ótti Ni.
Sonymen qatar ol doping daýyn oilaǵysy kelmeitinin, oilaityn ýaqyty da joq ekenin ashyp aitty.
«Tilshilerge jaqyndap ketsem, birden doping daýyn suraidy. Mende qazir ol týraly aitatyn, oilanatyn ýaqytym joq. Oilaǵymda kelip júrgen joq. Qazir bar oilaitynym Rio Olimpiadasy. Sportshylarymdy jarysqa qalai shyǵaramyn, kimniń kúshi qansha kóterýge jetedi, jarys kezinde kimge qansha salmaq kóterýge tapsyrys berem dep sonymen oilanyp júrmin», - dedi aýyr atletikadan Qazaqstan ulttyq quramasynyń bas bapkeri.
Esterińizge sala keteiik, Rio Olimpiadasynda aýyr atletterimiz 6 tamyz kúni saǵat 19:00-de (Astana ýaqytyboiynsha 7 tamyz tańǵy saǵat 04:00) jarystaryn bastaidy. Bul kúni áielder arasyndaǵy básekede 48 kelidegi qyzymyz M. Eliseeva óner kórsetedi.
Al jarystyń ekinshi kúni saǵat 19:00-de (Astana ýaqyty boiynsha 8 tamyz tańǵy saǵat 04:00) erler arasynda 56 keli salmaqtaǵy legionerimiz A. Chontei el namysyn qorǵaidy.
Tamyzdyń 8-i kúni saǵat 19:00-de (Astana ýaqyty boiynsha 9 tamyz tańǵy saǵat 04:00) taǵy bir legioner, aýyr atletimiz 62 keli salmaqtaǵy F. Harkidiń ziltemirdi qalai kótergenin kóretin bolamyz.
Tamyzdyń 9-y kúni saǵat 15:30-da (Astana ýaqyty boiynsha 10 tamyz saǵat 00:30) 63 keli salmaqtaǵy aýyr atlet qyzymyz L. Gorichevanyń ónerin tamashalaimyz.
Tamyzdyń 10-y kúni 15:30-da (Astana ýaqyty boiynsha 11 tamyz saǵat 00:30) qazaqtyń qarakóz qyzy J. Japparqul 69 keli salmaqta el namysyn qorǵaidy.
Osy kúni keshki saǵat 19:00-de (Astana ýaqyty boiynsha 11 tamyz tańǵy saǵat 04:00) 77 kelide erler arasynda N. Rahimov synǵa túsedi.
Tamyzdyń 12-i kúni saǵat 19:00-de (Astana ýaqyty boiynsha 13 tamyz tańǵy saǵat 04:00) erler arasynda 85 keli salmaqta D. Ulanov óz ónerin pash etedi.
Aýyr atletterimizdiń básekesi úsh kún úzilisten keiin, iaǵni tamyzdyń 15-i kúni qaita jalǵasady.
Bul kúni saǵat 19:00-de (Astana ýaqyty boiynsha 16 tamyz tańǵy saǵat 04:00) +105 keli salmaqtaǵy ziltemirshimiz qyzylordalyq A. Zaichikov el namysyn qorǵaidy.
