Ulytaý oblysynyń Qyzyljar aýylynda turatyn 116 jastaǵy Túimegúl Temirbaeva Quryltai sailaýyna qatysyp, óz tańdaýyn jasady. 1910 jyly dúniege kelgen keiýana búginde Qazaqstandaǵy eń qart azamattardyń biri sanalady, dep habarlaidy ult.kz.
Oblys ákimdiginiń málimetinshe, ǵasyrdan astam ǵumyr keshken Túimegúl apanyń el úshin mańyzdy qoǵamdyq-saiasi naýqanǵa qatysýy onyń azamattyq belsendiligin ǵana emes, el bolashaǵyna degen jaýapkershiligin de ańǵartty.
Túimegúl Temirbaeva ómiriniń basym bóligin eńbekpen ótkizgen. Joldasy Aiazbai Temirbaevpen birge jylqy ósirip, otbasynyń berekesin arttyrǵan. Búginde ol 15 nemere men 25 shóbereniń aiaýly ájesi.
Uzaq ómir súrýiniń syryn suraǵandarǵa Túimegúl apa adal eńbek, jaqsy niet pen jaqyndarǵa degen súiispenshilikti alǵa tartady. Buǵan deiingi suhbattarynda da áli kúnge deiin úi sharýasyna aralasatynyn, qurt jasaitynyn jáne qolynan kelgenshe sharýashylyq jumystaryna kómektesetinin aitqan.
Daýys berý kezinde aq jaýlyqty ana elge aq tilegin arnady. Ol urpaǵyna densaýlyq pen amandyq, elge tynyshtyq, Qazaqstanǵa jarqyn bolashaq tiledi.
— Urpaǵymyz aman-saý bolsyn, elimizde beibitshilik bolsyn. Elimizdiń bolashaǵy jarqyn bolsyn, — dedi Túimegúl apa.
116 jastaǵy keiýananyń sailaýǵa qatysýy kópshilikke oi salǵan oqiǵa boldy. Onyń bir ǵana daýysy ǵasyrdan astam tarihty kórgen urpaqtyń el erteńine degen tilegindei áser qaldyrdy.
Aita keteiik, Túimegúl Temirbaeva buǵan deiin de qoǵamdyq mańyzy bar naýqandardan shet qalmaǵan. 2026 jylǵy respýblikalyq referendým kezinde de arnaiy jyljymaly daýys berý jáshigi arqyly óz tańdaýyn jasaǵan.
