100 oqýlyqtyń elektrondy mátinderi Qazaqstandyq ashyq ýniversitet negizinde jańa alfavitte jariialanýy qajet. Bul týraly QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń keńeitilgen májilisinde QRO Memlekettik hatshysy Qyrymbek Kósherbaev aitty, dep habarlaidy QazAqparat.
«Birinshiden, «Rýhani jańǵyrý» baǵdarlamasy aiasynda, memlekettik qoldaýmen shyqqan barlyq shyǵarmashylyq týyndylardyń qoǵamdyq igilik retinde erkin taraýy qamtamasyz etilsin. Memlekettik organdar men jekelegen uiymdar oǵan ielik etpeýi tiis. Ekinshiden, «Jańa gýmanitarlyq bilim. Qazaq tilindegi 100 jańa oqýlyq» jobasy boiynsha aýdarylyp shyqqan oqýlyqtar men ǵylymi ádebiettiń oqý baǵdarlamalaryna engizilip, tiimdi qoldanylýy qamtamasyz etilsin. Úshinshiden, Qazaqstan Respýblikasynyń «Bilim týraly» zańyna qashyqtan oqytýdy jáne qashyqtan bilim beretin oqý oryndaryn zańdastyratyn jáne onlain oqytý qyzmetin retteitin tolyqtyrý engizý qajet», - dedi Memlekettik hatshy.
Onyń atap ótýinshe, tórtinshiden, «Ulttyq aýdarma biýrosy» negizinde jinaqtalǵan tájiribe men mamandardyń potentsialyn joǵaltpaý óte mańyzdy. Qazirgi suranys pen qajettilikti eskere otyryp, balalar jáne jasóspirimder ádebieti, gýmanitarlyq jáne tehnikalyq oqýlyqtar men ádebiet, iskerlik ádebiet jáne basqa da ózekti aýdarma baǵyttaryn qamtityn turaqty jumys jospary jasalyp, iske asyrylý qajet.
Besinshiden, «Ulttyq aýdarma biýrosy» jáne Oksford ýniversitetiniń baspasy daiyndaǵan «Qazaq-aǵylshyn», «aǵylshyn-qazaq» Oksford sózdigi basylyp, barlyq orta jáne joǵary oqý oryndarynyń kitaphanalaryna jetkizilsin. Altynshydan, latyn grafikasyna kezeń-kezeńmen ótý jospary aiasynda aýdarylǵan 100 oqýlyqtyń elektrondy mátinderi Qazaqstandyq ashyq ýniversitet negizinde jańa alfavitte jariialanýy qajet dep esepteimiz. Sonymen birge, mektep baǵdarlamasyna kirgen qazaq ádebietiniń klassikalyq týyndylary Kitap.kz – Qazaqstannyń ashyq kitaphanasy negizinde latyn grafikasyna kóshirilsin», - dedi Qyrymbek Kósherbaev.
