2020-2021 oqý jylyna arnalǵan magistratýra dárejesi boiynsha granttar 10 202 adamǵa taǵaiyndaldy. Bul týraly QR BǴM Joǵary jáne joǵary oqý ornynan keiingi bilim berý departamentiniń direktory Ádilet Toibaev aitty, dep habarlaidy "Ult aqparat".
«Búgin 2020-2021 oqý jylyna arnalǵan magistratýra dárejesi boiynsha granttardy taǵaiyndaý konkýrstyq komissiianyń sońǵy otyrysy ótti. Beiindi baǵyttarda magistratýra boiynsha grant iegerleri anyqtaldy. Osymen konkýrstyq komissiianyń resmi jumysy aiaqtaldy. 2020-2021 oqý jylyna magistratýrgaǵa 12 829 grant bólindi. Ǵylymi-pedagogikalyq baǵyt boiynsha 12 119, beiindik magistratýrǵa 710 grant bólinip otyr», - dedi ol.
Onyń atap ótýinshe, keshendi testileý 17 tamyz ben 1 qyrkúiek aralyǵynda ótti. Keshendi testileý alǵash ret kompiýterlik formatta elektrondy túrde ótkizildi.
«Keshendi testileý aiasynda alynǵan balldar negizinde konkýrs boldy. Testileýge 38 199 adam ótinish berdi. Olardyń ishinde 34 746 talapker qatysty. Osy talapkerdiń arasynda 13 051 úmitker memlekettik bilim berý grantyn taǵaiyndaý konkýrsyna qatysý múmkindigine ie boldy. Demek, 13 myńnan astam talapker keshendi testileýden 75-ten joǵary ball jinaǵan. 5 qyrkúiekke deiin konkýrsqa qabyldaý júrgizdik. Granttardy taǵaiyndaý konkýrsyna 12 179 adam qatysty. Konkýrs 2 kún júrgizildi. Nátijesinde komissiia sheshimimen 10 202 adam grant igeri atandy. Onyń 128 úmitker beiindik magistratýra negizinde grant aldy», - dedi Ádilet Toibaev.
