2022 jyldyń qańtar aiynan bastap birinshi synyp oqýshylaryna «Tsifrlyq saýattylyq» páni oqytylady. Bul týraly Bilim ministrligi habarlady.
Buǵan deiin oqýshylar úshinshi synyptan bastap «Aqparattyq-kommýnikatsiialyq tehnologiialar» pánin meńgergen bolatyn.
«Oqý baǵdarlamasy suranys pen ýaqyt talaptaryna sáikes bolýy tiis. Búgingi tańda tsifrlyq álemniń qarqyndy damyp jatqanyn kórip otyrmyz. Qazir smartfondar men kompiýterlerdi mektepke deiingi kishi jastaǵy balalar paidalanyp jatady. Tsifrlyq saýattylyq – oqý men jazý siiaqty negizgi daǵdylardyń birine ainalyp keledi. Sondyqtan balalardy tsifrlyq saýattylyq jáne aqparattyq qaýipsizdik negizderine múmkindiginshe erterek úiretý mańyzdy. Álbette, jańa pándi oqytý barysynda balalardyń jas erekshelikteri de eskeriletin bolady», – dep atap ótti QR BǴM Mektepke deiingi jáne orta bilim komitetiniń tóraǵasy Gúlmira Kárimova.
Sonymen qatar 4-synypqa arnalǵan «Aqparattyq-kommýnikatsiialyq tehnologiialar» jáne 5-11 synyptarǵa arnalǵan «Informatika» pánderi boiynsha oqý baǵdarlamalary qaita qaraldy. Jańashyldyqtar balalardyń aqparattyq tehnologiialar salasynda sapaly bilim alýyna baǵyttalǵan.
Mektep baǵdarlamasy sheńberinde eń tanymal Python baǵdarlamalaý tili oqytylady. Sondai-aq 5-9 synyp oqýshylary 3D-modeldeý men 3D-printingke boiynsha bilim alady.
10-11 synyptardaǵy «Informatika» páni boiynsha úlgilik oqý baǵdarlamasy IT-salasynyń zamanaýi damý úrdisterin eskere otyryp ázirlengen. Oqytý baǵdarlamasynda IT-STARTUP, virtýaldy jáne tolyqtyrylǵan shynaiylyq, jasandy intellekt, mobildi qosymshalardy ázirleý, BigData jáne taǵy basqa taqyryptar bar. Sondai-aq barlyq synyptyń oqý baǵdarlamalaryna Internet jelisindegi qaýipsizdik erejeleri, avtorlyq quqyq týraly taqyryptar engizilgen.
