1 qyrkúiekte mektep aýmaǵynda muǵalimderge gúl men ózge de syilyqtar tartý etýge bolmaidy. Bul týraly Oqý-aǵartý birinshi vitse-ministri Shynar Aqparova OKQ brifinginde málimdedi, dep habarlaidy ult.kz.
Jýrnalister ata-analardyń muǵalimderge gúl syilaýyna qatysty qandai da bir shekteý bar-joǵyn jáne gúl shoǵyna qansha qarajat jumsaýǵa bolatynyn surady.
«Biz jergilikti atqarýshy organdarǵa tiisti hat joldadyq. Mektep qabyrǵasynda gúl men qandai da bir syilyqtar tartý etýge ruqsat etilmeidi. Biz muny bólek kórsettik. Sondyqtan buǵan eshqandai qajettilik joq», – dedi Shynar Aqparova.
Osylaisha, ministrlik muǵalimge syiǵa tartylatyn gúl shoǵynyń naqty qunyn atamady. Vedomstvonyń túsindirmesi mektep aýmaǵynda gúl nemese ózge syilyq berýge qatysty bolyp otyr.
Sonymen qatar 1 qyrkúiekte barlyq mektepte biryńǵai synyp saǵattary ótedi. Al kolledjderde kýratorlyq saǵattar uiymdastyrylady. Vitse-ministrdiń aitýynsha, olardyń uzaqtyǵy shamamen 45 minýt bolady.
Aita keteiik, ministrliktiń pedagogterge gúl syilaýǵa qatysty ustanymy buǵan deiin ózgeshe bolǵan. 2024 jyly vedomstvo muǵalimge gúl tartý etýge bolatynyn aityp, muny qurmet pen rizashylyqtyń belgisi dep baǵalaǵan. Burynǵy oqý-aǵartý ministri Ǵani Beisembaev ta oqýshylardyń muǵalimge gúl syilaýyn igi dástúr retinde ataǵan.
Qazaqstanda 2026-2027 oqý jyly 1 qyrkúiekte bastalyp, 25 mamyrda aiaqtalady. Birinshi synyp oqýshylaryna aqpan aiynda qosymsha demalys beriledi.
