Biyl mektepterde 1-synypqa arnalǵan saltanatty sharalar ótedi. Bul týraly bilim jáne ǵylym ministri Ashat Aimaǵambetov Tengrinews portalynyń Instagram paraqshasynda bergen suhbatynda aitty, dep habarlaidy Sputnik.
"Dástúrge sáikes, birinshi qyrkúiekte saltanatty sharalar ótedi. Bilim kúni bolǵannan keiin biyl qabyldanǵan sheshimge sáikes, mektep tabaldyryǵyn endi attap otyrǵan balalarǵa jiyn ótkiziledi. Saltanatty sharaǵa kelgen 1-synyp oqýshylarynyń qolyna "Álippe" nemese "Býkvar" beriledi", - dedi bilim jáne ǵylym ministri.
Al 1 qyrkúiekte mektepke kelgen 2-11 synyptyń oqýshylaryna kabinetterde synyp saǵaty ótkiziledi.
Ministrdiń aitýynsha, shara ashyq aýada, mekteptiń aýlasynda bolady. Birinshi synyp oqýshylaryn mektepke ertip keletin adamdarǵa qatysty jumys uiymdastyrylady.
Aita keteri, 2021-2022 oqý jyly dástúrli formatta bastalady. Bul sheshim balabaqsha, mektepter men kolledj, joǵary oqý oryndaryna qatysty bolyp otyr. Ýniversitettegi bakalavr, magistratýra jáne doktorantýrada oqityndardyń barlyǵy dástúrli formatta bilim alýǵa kóshedi.
Bilim oshaqtarynda qatań túrde sanitarlyq talaptar saqtalady. Ashyq qosymshasyn qyzmetkerler, oqytýshylar, balabaqsha tárbieshileri jáne balany bilim ordasyna alyp kelgen adamdar men stýdentter qoldanady.
"Eger synypta bir bala aýyryp qalsa, sol synyptyń ózi ǵana qashyqtan ótý formatyna jiberiledi. Dene qyzýy bar balalar ýaqytsha qashyqtan oqidy. "Ashyq" qosymshasy arqyly tekseristen ótken kezde ata-anasynyń "qyzyl" mártebesi bolsa, stýdent nemese oqýshy úiden oqidy. Onyń virýs juqtyryp-juqtyrmaǵany eskerilmeidi", - dedi ministr.
Qazir mektepter osy baǵyt boiynsha daiyndalyp jatyr. Ministr buryn aýa raiynyń qolaisyzdyǵyna bailanysty sabaq ótpegenin, endi mundai jaǵdaida oqý toqtamai, onlain formatta bolatynyn aitty.
Sondai-aq, ministr buǵan deiin ata-ana ótinishi boiynsha oqýshy qashyqtan bilim alsa, endi ondai múmkindik berilmeitinin jetkizdi.
