Biyl 1 qarashada magistratýraǵa túsý úshin ekinshi márte ótkiziletin keshendi testileýge qujattardy qabyldaý bastalady, dep habarlaidy "Ult aqparat" Bilim jáne ǵylym ministrligine silteme jasap.
Esterińizge sala keteiik, buǵan deiin Bilim jáne ǵylym ministri Ashat Aimaǵambetov áleýmettik jelidegi paraqshalarynda magistratýra men doktorantýraǵa túsý boiynsha qabyldanǵan sheshim týraly habarlady. Endi oqýǵa qabyldaý jylyna eki ret ótkiziledi. Baiqaýǵa jazda grantqa túse almaǵan úmitkerler de, buryn keshendi testileýden ótpegender de qatysa alady.
«Mundai mańyzdy sheshimderdi qabyldaý kezinde ministrlik stýdentterdiń múddesin árqashan birinshi orynǵa qoiady. Buǵan deiin Bilim jáne ǵylym ministri Ashat Aimaǵambetov memlekettik grantqa úmitkerler jylyna eki ret, dástúrli túrde – jazda jáne qosymsha qysta testileýden óte alatynyn habarlaǵan. Endi talapkerler 1 qarashadan bastap magistratýraǵa túsý úshin ekinshi márte ótkiziletin keshendi testileýge qujattaryn tapsyra alady. Testileýdi sátti tapsyrǵan jaǵdaida úmitkerler jaz aiynda oqýǵa qabyldaý qorytyndysy boiynsha bólingen granttardy utyp ala alady», - dep atap ótti Bilim jáne ǵylym vitse-ministri Qýanysh Erǵaliev.
Endigi kezekte emtihanǵa tirkelý, mamandyq bólinisinde grant sany týraly aityp ótsek. Ekinshi keshendi testileýge qatysý úshin tirkelý QR BǴM Ulttyq testileý ortalyǵynyń app.testcenter.kz saitynda ótedi. Qujattardy qabyldaý 2021 jylǵy 1-15 qarasha aralyǵynda júrgiziledi. Keshendi testileý 2021 jyldyń 18 qarashasynan 11 jeltoqsanyna deiin ótedi. Magistratýraǵa grantqa úmitkerler dástúrli túrde shet tili, bilim berý baǵdarlamalary tobynyń beiini boiynsha jáne oqýǵa daiyndyǵyn anyqtaý boiynsha test tapsyrady.
Shet tilin meńgergenin rastaityn halyqaralyq sertifikaty bar adamdar avtomatty túrde shet tili boiynsha testileýden bosatylady. Test nátijelerin testileý aiaqtalǵannan keiin birden bilýge bolady. Nátijesimen kelispegen jaǵdaida qatysýshy emtihan aiaqtalǵan soń 30 minýttan keiin onlain apelliatsiiaǵa ótinish beredi.
Memlekettik bilim berý tapsyrysy boiynsha jáne aqyly negizde ǵylymi-pedagogikalyq magistratýraǵa túsý úshin shekti ball – 75, beiindi magistratýraǵa túsý úshin 50 ball. Magistratýraǵa bilim berý granttaryn taǵaiyndaý konkýrsyna qatysý úshin qujattar 2021 jylǵy 25 jeltoqsanǵa deiin qabyldanady. Magistratýraǵa qabyldaý 2021 jylǵy 26 jeltoqsan men 10 qańtar aralyǵynda ótedi. Magistratýraǵa túsýshiler barlyǵy 3 myńnan astam memlekettik bilim grantyna úmitker bola alady.
Mamandyqtar bólinisinde eń kóp grant «Himiia» (172 grant), «Veterinariia» (169), «Mehanika jáne metall óńdeý» (156), «Metallýrgiialyq injeneriia» (137), «Qurylys materialdaryn, buiymdaryn men konstrýktsiialaryn óndirý» (132 grant), «Materialtaný jáne jańa materialdar tehnologiiasy» (130) jáne basqa mamandyqtar boiynsha bólindi.
