2019 jyldyń 1 aqpanynda Qazaqstannyń halyq sany 18 mln 415,5 myń adamǵa jetip, 2018 jyldyń 1 aqpanymen salystyrǵanda 237,9 myń adamǵa nemese 1,3 paiyzǵa ósti. Bul jaiynda QR UEM Statistika komitetinen málim etti, dep habarlaidy QazAqparat tilshisi.
Atalǵan kezeńdegi halyq sany 10 mln 709,4 myń adamdy nemese jalpy halyq sanynyń 58,2 paiyzyn, al aýyl halqy 7 mln 706,1 myń adamdy nemese 41,8 paiyzdy qurady.
Osy jyldyń qańtarynda respýblikada 1 jasqa deiingi 314 sábi (ótken jyldyń qańtarynda - 317) ólimi tirkeldi. 2018 jyldyń qańtarymen salystyrǵanda 1 jasqa deiingi sábi ólim-jitimi 0,9 paiyzǵa kemidi. 2019 jyldyń qańtarynda sábi óliminiń koeffitsienti 1000 dúniege kelgen balaǵa shaqqanda 9,32 oqiǵa boldy. Sábi ólim-jitiminiń negizgi sebebi perinataldyq kezeńde paida bolǵan jaǵdai sanalady. Onyń saldarynan qańtarda 159 bala shetinedi. Týa bitken aýytqýdan 60, tynys alý músheleri aýrýynan 33, tótenshe jaǵdailardan 11 bala kóz jumdy.
Osy jyldyń qańtarynda ótken jyldyń qańtarymen salystyrǵanda Qazaqstanǵa kelýshilerdiń sany 25,1 paiyzǵa, ketýshilerdiń sany 8,6 paiyzǵa artty. Negizgi migratsiialyq almasýlar TMD elderine tiesili. TMD elderinen kelgenderdiń úlesi 84,5 paiyzdy jáne atalǵan memleketterge ketkender sany 90,5 paiyz boldy.
El aýmaǵynan tysqary ketken migranttar sany 0,7 paiyzǵa artty. Óńiraralyq qonys aýdarýda kóshi-qonnyń oń saldosy Batys Qazaqstan (25 adam), Pavlodar (52), Túrkistan (1 326) oblystarynda jáne Astana (1 783) men Almaty (2 128) qalalarynda tirkelgen.
