Májilis depýtaty Ashat Aimaǵambetov óziniń telegram arnasynda meditsinalyq bilim berý júiesine engiziletin túzetýler týraly jazdy, dep habarlaidy ult.kz.
Depýtattyń aitýynsha, 2022 jylǵa deiin oqýǵa túsken stýdentter úshin eshteńe ózgermeidi. Jańa ózgerister tek 2022 jyldan keiin meditsinalyq ýniversitetterge túskenderge qatysty bolady.
Qazir meditsina ýniversitetterinde oqý úsh túrli júie boiynsha júrgiziledi:
• 2019 jyly oqýǵa túskender (biyl bitiredi) «5 jyl bakalavriat + 2 jyl internatýra» júiesimen oqidy. 7 jyldan keiin olar tek jalpy tájiribelik dáriger (JTD) bolyp jumys istei alady. Tar beiindi mamandyq úshin rezidentýra qajet.
• 2020-2021 jyldary túskender (2026-2027 jylǵy túlekter) «5+1» júiesi boiynsha bilim alady. 6 jyldan keiin tek 6 mamandyq boiynsha jumys isteýge múmkindik beriledi. Tar baǵyttaǵy maman bolý úshin de rezidentýra mindetti.
• 2022 jyly túskender 6 jyl oqýy tiis. Onyń ishinde bakalavriat, magistratýra jáne nebári jarty jyl internatýra bar. Alǵashqy túlekter diplomdy 2028 jyly alady.
Mundai júiedegi negizgi máseleler
• Jumysqa ornalasý qiyndyǵy
2028-2029 jyly ýniversitet bitirgen túlekter birden jumysqa shyǵa almaidy. Barlyǵy mindetti túrde 2-4 jyl rezidentýradan ótýi kerek. Biraq rezidentýra granttary túlekter sanynan áldeqaida az. Sondyqtan kóp stýdent oqý aqysyn óz qaltasynan tóleýge májbúr bolady.
• Praktikanyń azdyǵy
Baǵdarlamadaǵy bir jyl magistratýra kóbine dissertatsiia jazýǵa ketedi. Al internatýraǵa tek 6 ai qalady. Osy ýaqytta stýdenttiń aýrýhanada resmi mártebesi bolmaidy, aqparattyq júielerge qol jetkize almaidy jáne emdeý protsesine tolyq qatysa almaidy.
• Tuiyq júie
Alty jyl oqyǵannan keiin de stýdent jalpy tájiribelik dáriger bolyp jumys istei almaidy. Ol úshin taǵy da rezidentýra qajet.
Ne ózgeredi?
1. 7 jyldyq oqý júiesi qaita engiziledi
Jańa format:
• 6 jyl oqý
• 1 jyl tolyqqandy aýrýhanalyq internatýra
2. Ýniversitetten keiin jumys isteý múmkindigi bolady
Oqýdy aiaqtaǵan túlekter:
• jalpy tájiribelik dáriger bolyp,
• bastapqy meditsinalyq kómektiń taǵy 5 baǵyty boiynsha jumys istei alady.
Al tar beiindi maman (nevropatolog, neirohirýrg jáne t.b.) bolǵysy kelse, rezidentýrada oqýyn jalǵastyrady.
Sonymen qatar oqý baǵdarlamasy kúsheitilip, kredit sany artady.
Mańyzdy jańalyqtar
Fýndamentaldy pánder kúsheitiledi
Anatomiia men fiziologiia sekildi negizgi pánder mindetti baǵdarlamaǵa qatań engiziledi. Barlyq medýniversitetter olardy tolyq kólemde oqytýy tiis. Bazalyq bilimnen keiin stýdentter táýelsiz emtihan tapsyrady.
«Dáriger-intern» mártebesi engiziledi
6-kýrs stýdentteri alǵash ret resmi túrde «dáriger-intern» mártebesin alady. Bul:
• meditsinalyq júielerge qol jetkizýge,
• tálimger baqylaýymen protsedýra jasaýǵa,
• jalaqy alýǵa,
• qorǵanys quraldarymen qamtamasyz etilýge múmkindik beredi.
Iaǵni bul jai formaldy tájiribe emes, naqty jumys tájiribesi bolmaq.
2022 jyldan keiin túsken stýdentterge tańdaý beriledi
Ministrlik stýdentterdiń usynysyn eskerip, olarǵa tańdaý quqyǵyn qaldyrdy.
• Qalasa, stýdent burynǵy 6 jyldyq júiemen oqyp, birden rezidentýraǵa túse alady.
• Nemese jańa 7 jyldyq baǵdarlamaǵa aýysyp, ýniversitetten keiin birden jumys isteý múmkindigin paidalana alady.
Sońǵy sheshimdi stýdentterdiń ózi qabyldaidy.
