Memleket basshysynyń tapsyrmalaryn iske asyrý aiasynda Premer-ministrdiń birinshi orynbasary Nurlybek Nálibaev Qaraǵandy oblysyna jumys saparymen baryp, negizgi mindetterdiń oryndalý barysyn tekserip, óńirdegi iri indýstriialyq jáne energetikalyq jobalardyń damýymen tanysty. Negizgi nazar ónerkásip kásiporyndaryn jańǵyrtýǵa, jylý berý maýsymyna daiyndyqqa, jylý energetikasyn damytý men gazdandyrý máselelerine aýdaryldy.
Temirtaýda Premer-ministrdiń birinshi orynbasary Qarmet metallýrgiialyq kombinatynda bolyp, óndiristik úderistermen jáne kásiporyndy jańǵyrtý baǵdarlamasymen tanysty.
«Domna peshterin tabiǵi gazǵa kóshirý mazýtty paidalanýdan tolyq bas tartýǵa, agregat jumysynyń turaqtylyǵyn arttyrýǵa jáne qorshaǵan ortaǵa áserdi azaitýǵa múmkindik berdi», — dedi Qarmet Corporation basqarma tóraǵasy Petr Trýshin.
Sondai-aq Nurlybek Nálibaevqa kombinattaǵy jańa óndiristik nysandar qurylysynyń barysy baiandaldy.
2025 jyldyń qorytyndysy boiynsha kásiporyn 3,8 mln tonna bolat óndirgen. «5–9–5» strategiiasy aiasynda kompaniia 2028 jylǵa qarai bolat óndirisin 5 mln tonnaǵa, kómir óndirisin 9 mln tonnaǵa jáne temir keni kontsentratyn 5 mln tonnaǵa deiin jetkizýdi josparlap otyr.
Sapardyń jeke bir bóligi 2026–2027 jyldardaǵy jylý berý maýsymyna daiyndyq pen Temirtaý jáne Qaraǵandy qalalaryndaǵy energetikalyq infraqurylymdy jańǵyrtýǵa arnaldy.
«Aldaǵy jylý berý maýsymynda eshqandai másele bolmaýy tiis. 1 qyrkúiekke deiin barlyq nysandardyń daiyndyq pasporttary alynýy qajet. Jylý maýsymy kezinde eshqandai irkiliske jol berilmeýi kerek», — dep atap ótti Nurlybek Nálibaev.
Vitse-premer sondai-aq Qaraǵandy JEO-3-tegi jóndeý naýqanynyń barysymen jáne stantsiiany keńeitý jobasymen tanysty. Jańa energiia blogy elektr qýatyn 140 MVt-qa, al jylý qýatyn saǵatyna 180 Gkal-ǵa arttyrýǵa múmkindik beredi.
«JEO-3-ti keńeitý — óńirdegi eń iri infraqurylymdyq jobalardyń biri. Jumystar aiaqtalǵannan keiin qosymsha qýat rezervi qurylyp, 400-den astam turǵyn úi men áleýmettik nysandar jylýmen qamtamasyz etiledi», — dedi «Qaraǵandy Energotsentr» JShS bas direktory Fliýr Garipov.
Sapar barysynda Qaraǵandyny gazdandyrý máseleleri de qaraldy. Biyl jobanyń birinshi kezeńin aiaqtaý josparlanyp otyr.
«Birinshi kezeń aiasynda gaz 10 myńnan astam abonentke jetkiziledi. Bul jumystar aiaqtalǵan soń ekinshi kezeńge — Prishahtinsk, Maiqudyq jáne Sortirovka aýdandaryna kóshemiz», — dep baiandady Qaraǵandy qalasynyń ákimi Meiram Qojyqov.
Óńirdiń indýstriialyq damýy aiasynda Nurlybek Nálibaev óńdeý ónerkásibindegi birqatar kásiporyndardy aralady.
«TEMPO Qazaqstan» zaýytynda oǵan bolattan tik jikti qubyrlar shyǵaratyn jańa óndiristik jeli tanystyryldy. Diametri 630 mm qubyrlardy kúidirý men shynyqtyrýdyń erekshe tehnologiiasy ónimdi −60-tan +60 gradýsqa deiingi temperatýrada paidalanýǵa múmkindik beredi. Qazaqstanda mundai óndiristiń balamasy joq.
Silk Road Electronics kásipornynda vitse-premer turmystyq tehnika óndirisimen jáne lokalizatsiia baǵdarlamasymen tanysty. Qazir zaýytta kir jýǵysh mashinalar, shańsorǵyshtar, boilerler, asúi plitalary, teledidarlar men aýa tartqyshtar shyǵarylady.
«Qazirgi ýaqytta kásiporynda shamamen 300 adam jumys isteidi. Jylyna 1 million dana ónim shyǵaratyn tolyq qýatqa shyqqannan keiin qyzmetkerler sany 800 adamǵa deiin artady», — dedi kompaniianyń operatsiialyq direktory Talǵat Ábdirahmanov.
