13 jyl boiy AQSh-tyń Federaldyq tergeý biýrosy men Niý-Iork shtatynyń politsiiasy el tarihyndaǵy eń jumbaq seriialyq kisi óltirýlerdiń birin tergedi. 2010 jyldyń jeltoqsany men 2011 jyldyń sáýiri aralyǵynda Long-Ailend aralynan segiz seks-qyzmetkerdiń máiiti tabylǵan. Alaida bul qylmystarǵa kúdikti adam 2023 jyly bir-aq anyqtaldy. Ol arhitektýralyq biýro iesi Reks Hoiermann bolyp shyqty. Ol óz qylmysyn 2026 jyldyń 8 sáýirinde bir-aq moiyndady, dep habarlaidy ult.kz.
It ertken adam
16 jyl buryn politsiia birneshe adam ólimine bailanysty qorqynyshty isti tergei bastady. Keiin bul qylmystardyń izi 1990 jyldarǵa deiin baryp tireletini belgili boldy.
2010 jyldyń 1 mamyrynda Long-Ailendtegi Oýk-Bich aýdanynda seks-qyzmetker Shennon Gilbert joǵalyp ketken. Sol túni ol klientiniń úiinen qorqyp júgirip shyǵyp, kórshilerden kómek suraǵan. Artynsha 911 qyzmetine qońyraý shalyp, ózin bireý ańdyp júrgenin jáne óltireiin dep júrgenin aitqan. Osydan keiin Shennondy eshkim kórmegen.
911 operatory Shennon Gilberttiń bireýdiń kómeginen bas tartqanyn estigen. Oqiǵa ornyna kelgen politseiler onyń jeńgetaiymen, klientimen jáne kórshisimen sóilesken. Olardyń aitýynsha, Shennon ózin oǵash ustap, qatty qorqyp júrgen. Keiin ol qarańǵy jaqqa qarai júgirip ketken, sodan keiin ony eshkim kórmegen.
2010 jyldyń 11 jeltoqsanynda kinolog Djon Malliia men onyń Bliý atty qyzmettik iti Shennondy izdeý kezinde Oýshen-Parkvei jolynyń mańynan adam súiekterin tapqan. Súiekter shirip ketken qapqa oralǵan. Osydan keiin politsiia mańaidy tolyq teksere bastaǵan. Eki kúnnen keiin alǵashqy jerden shamamen 400 metr qashyqtyqtan taǵy úsh áieldiń máiiti tabyldy.
Sarapshylardyń aitýynsha, alǵash tabylǵan súiekter 2009 jyly joǵalyp ketken 24 jastaǵy seks-qyzmetker Melissa Bartelemige tiesili bolǵan. Al jaqyn mańnan Morin Breinard-Barns, Megan Ýoterman jáne Ember Kostellonyń deneleri shyqqan. Bul áielderdiń bári 2007–2010 jyldary joǵalyp ketken.
2010 jyldyń 14 jeltoqsanynda Saffolk okrýginiń politsiiasy bul aimaqta seriialyq qylmysker bolýy múmkin ekenin málimdedi. Keiin bul tórt áiel «Gilgo tórttigi» dep ataldy.
Alaida qorqynyshty jáitter munymen toqtamady. 2011 jyldyń naýryzynda sol mańnan 2003 jyly óltirilgen Djessika Teilordyń bas súiegi men qoldary tabyldy. Al sáýir aiynda Gilgo jaǵajaiynan 2000 jyly óltirilip, denesi bólshektelgen Valeri Maktyń súieginiń qaldyqtary shyqqan. Kóp uzamai sol jerden 1996 jyly qaza tapqan Karen Vergatanyń qańqasy da tabyldy. Bir sózben aitqanda, Malliia men onyń iti Bliý maniaktyń óz qolymen jasaǵan tutas «ziratyn» taýyp alǵan.
Jaǵdaidy odan saiyn úreili etkeni Valeri Maktyń qasynda eki jasar qyzdyń súiegi jatqan. 2025 jyly onyń 1997 jyly joǵalyp ketken Tania Djeksonnyń qyzy ekeni anyqtaldy. Keiinirek sol aýmaqtan aziialyq jigittiń máiiti de tabyldy. Onyń kim ekeni áli kúnge deiin belgisiz.
Tergeý
Politsiia bul qylmystardyń bir-birimen bailanysty ekenin uzaq ýaqyt boiy anyqtai almaǵan. Sebebi máiitter men dene bólikteri ár jyldary tabylǵan. Onyń ústine joǵalǵan áielderdiń bári seks-qyzmetker bolǵandyqtan, ol kezde quqyq qorǵaý organdary mundai isterge asa mán bermegen.
Tipti kei adamdar olar basqa qalaǵa jumys isteýge ketken bolýy múmkin dep oilaǵan. Kei jaǵdaida týystary da olardyń joǵalǵanyn politsiiaǵa birden habarlamaǵan.
Soǵan qaramastan, tergeý birtindep jalǵasqan. Biraq bul iste kúmándi jaǵdailar da bolǵan.
2010–2011 jyldary tabylǵan máiitterdiń kóbi Saffolk okrýginen shyqqan. 2012 jyly osy okrýgtiń politsiia basshysy bolyp Djeims Berk taǵaiyndaldy. Ol buǵan deiin Niý-Iork politsiiasynda júrgen kezinde qyzmettik ókiletin asyra paidalandy degen daýǵa ilingen.
Keiin ony basqa aimaqqa aýystyrǵanymen, jańa qyzmetinde de máseleler týyndaǵan. Berk Federaldyq tergeý biýrosynyń (FBI) bul iske aralasýyna qarsy bolǵan. Sebebi federaldyq agentter óziniń zańsyz áreketin de anyqtap qoiýy múmkin dep qoryqqan. Aqyry solai boldy. Keiin Berktiń ustalǵan adamdardy uryp-soǵyp, dálelderdi qoldan jasaǵany belgili bolyp, qyzmetinen qýylǵan.
Long-Ailendtegi maniak týraly is tek 2022 jyly qaita qarqyn aldy. Sol kezde okrýg prokýrory arnaiy tergeý tobyn qurǵan. Ol ýaqytta tergeýshilerdiń qolynda kúdiktini anyqtaýǵa kómektesetin birneshe mańyzdy dálel bolǵan. Olar uialy telefondardyń qai jerde bolǵanyn teksergen, qurbandar kimmen bailanysqa shyqqanyn zerttegen. Sonymen qatar kei máiitterdiń janynan tabylǵan shash nemese basqa biologiialyq izderden DNQ saraptamasy jasalǵan.
Kúdikti
2023 jyly tergeýshiler kúdiktiler qataryn birneshe adamǵa deiin qysqartty. Sol jyldyń 13 shildesinde 59 jastaǵy arhitektor Reks Hoiermann ustaldy. Ol 1993 jyly Nort-Si aýdanynan denesi tabylǵan Sandra Kostilianyń ólimine kúdikti retinde tanyldy. Tergeýshiler onyń denesinen Hoiermannnyń shashyn tapqan.
Arhitektor Manhettende jumys istegenimen, Long-Ailendtegi Massapekýa-Park qalashyǵynda turǵan. Qurbandardyń deneleri dál osy mańnan tabylǵan. Hoiermann boiy 193 santimetr, salmaǵy 100 keliden asatyn iri deneli adam bolǵan. Onyń ómirbaianyn bilgen kópshilik «maniaktar dál osyndai bolady» degen pikir aitqan.
Ol 1963 jyly Long-Ailendte dúniege kelgen. Ákesi aeroǵarysh salasynyń injeneri bolǵan. Mektepte ony boiynyń uzyndyǵy, artyq salmaǵy jáne tuiyq minezi úshin qatarlastary jii mazaqtaǵan. Biraq ol ózin qorǵai biletin adam bolǵan. Hoiermann Niý-Iork tehnologiialyq kolledjin arhitektýralyq tehnologiia mamandyǵy boiynsha támamdap, keiin RH Consultants & Associates kompaniiasyn qurǵan. Firma eski ǵimarattardy qaita jóndeý, zańdyq máselelerdi sheshý siiaqty jumystarmen ainalysqan.
«Men arhitektýralyq máselelerdi sheshemin. Qurylys departamentimen kelissóz júrgizemin. Qarapaiym bolýy tiis jumys kúrdelene bastasa, adamdar maǵan habarlasady», - dedi ol.
Ol bul sózderdi 2022 jyly YouTube-taǵy Bonjour Realty arnasyna bergen suhbatynda aitqan.
Hoiermannnyń biznesi tabysty bolǵan. Onyń klientteri qatarynda American Airlines men Niý-Iork qalasynyń qorshaǵan ortany qorǵaý departamenti bolǵan. 1990 jyly ol Asa Ellorýpqa úilenip, keiin qyzy dúniege kelgen. Qyzy ýniversitetten keiin ákesiniń kompaniiasynda jumys istei bastaǵan. Kórshileriniń bir bóligi ony «únsiz júrgenimen qaýipti adam» dep sipattaǵan.
Bir kórshisi Hoiermannnyń otyn jaryp turǵanyn kórip, amandasqanyn aitady. Arhitektor oǵan úreili kózqaraspen qarap, baltanyń sabyn qysa túsken. Osydan keiin kórshisi oǵan jaqyndamaýǵa tyrysqan. Al keibireýler ony qarapaiym, sál ish pystyratyn, biraq ziiansyz adam dep sipattaǵan.
Áriptesteriniń pikiri de ekige bólingen. Biri ony óte bilikti maman dese, endi biri sýyq, tákappar jáne ózin bárinen aqyldy sanaityn adam retinde eske alǵan.
Maniaktyń otbasy
Hoiermannyń áieli men qyzy oǵan bastapqyda taǵylǵan aiyptarǵa senbegen. Jary Asa Ellorýp joldasyna degen senimi jyldar boiy sónbeitinin aitqan.
«Olar ony seks-qyzmetkerlermen júrgen deidi. Ne degen sóz? Men kúieýimdi qanaǵattandyrmaimyn ba? Ol kún saiyn úige kelip, men daiyndaǵan keshki asty ishedi. Bul jetkiliksiz be? Joq, men onyń qylmysker ekenine senbeimin», - deidi Hoiermannyń jary.
Qyzy Viktoriia da ákesin eshqashan qatygez adam dep oilamaǵanyn aitqan. Onyń sózinshe, ákesi olarǵa qol kótermegen, ashýlansa tek ydysty qattyraq laqtyratyn bolǵan.
Soǵan qaramastan, Hoiermann jertólede 279 qarýdan turatyn úlken arsenal saqtaǵan. Ol ańshylyqty jaqsy kórgen. Alaida muny onyń týystary ǵana bilgen.
Tergeý dereginshe, shabýyldardyń kóbi áieli men qyzy demalysqa ketken kezde jasalǵan.
Kináni dáleldeitin aiǵaqtar
Tergeýshilerdiń aitýynsha, Hoiermann bir rettik telefondar arqyly qurbandardyń keminde úsheýimen bailanysqan. Kostilianyń denesinen tabylǵan shashtar da oǵan tiesili bolýy múmkin degen boljam aityldy. Al Morin Breinard-Barnsty bailaǵan beldikterdiń birinen onyń áieli Asa Ellorýptyń DNQ-sy tabylǵan.
Kei qyzdar joǵalar aldynda olardyń telefony men Hoiermann satyp aldy delingen bir rettik telefondar bir jerde bolǵan. Qurbandar joǵalǵan soń olardyń týystary men dostaryna belgisiz adam qońyraý shalǵan. Melissa Bartelemidiń anasyna áldebireý birneshe ret habarlasyp, sońǵy sóilesýde:
«Men ony óltirdim», - dep aitqan.
Ol bul qońyraýdy Manhettenniń qaq ortasy Taims-skverden jasaǵan. Dál sol jerde Hoiermannnyń keńsesi ornalasqan.
Sonymen qatar Ember Kostellony úiinen alyp ketken klient Niý-Iorkte sirek kezdesetin Chevrolet Avalanche pikabymen júrgen. Dál sondai kólik Hoiermannda bolǵan.
Hoiermann aqyry bárin moiyndady
Qorǵaýshylar DNQ dálelderine kúmán keltirgen. Biomaterialdar pitstsa qorabyndaǵy qamyr qaldyqtarynan alynǵany aityldy. Advokattar muny zańsyz dálel dep atady.
Kostilia denesinen tabylǵan shashtardyń túbi bolmaǵandyqtan, DNQ alý múmkin emes degen pikir de aityldy.
Hoiermannnyń advokattary politsiia ony bul iske eń qolaily kúdikti retinde qarastyrǵanyn aitqan. Sebebi ol máiitter tabylǵan jerge jaqyn turǵan, kórshileri ol týraly kúmándi pikir aitqan jáne úiinde kóp qarý saqtalǵan.
Alaida 2026 jyldyń 8 sáýirinde bul kúmánderdiń bárine Hoiermannnyń ózi núkte qoidy. Sotta ol Ýoterman, Bartelemi, Kostello, Breinard-Barns, Mak, Teilor, Kostilia jáne Vergatany óltirgenin moiyndady. Sýdia odan áielderdi qalai óltirgenin suraǵanda, Hoiermann segiz ret:
«Tunshyqtyrdym», - dep jaýap bergen.
Eń qyzyǵy, sońǵy qurban boiynsha oǵan resmi aiyp taǵylmaǵan edi. Biraq soǵan qaramastan ol bul qylmysty da ózi jasaǵanyn moiyndaǵan. Tergeýshiler onyń ne úshin bulai istegenin áli kúnge deiin túsine almai otyr. Hoiermann endi ómiriniń sońyna deiin túrmede bolady.
Sonymen qatar bul is boiynsha áli de jaýapsyz qalǵan suraqtar kóp. Tania Djekson men onyń qyzyn kim óltirgeni belgisiz kúiinde qalyp otyr. Oýshen-Parkvei aýmaǵynan tabylǵan aziialyq jigittiń ólimi de áli ashylmaǵan.
Al báriniń bastalýyna sebep bolǵan Shennon Gilberttiń súiegi 2011 jyldyń jeltoqsanynda batpaqtan tabylǵan. Tergeýshiler onyń sýǵa batyp qaitys bolǵanyn aitqan. Alaida týystary Shennondy da Hoiermann óltirdi dep esepteidi. Biraq ony dáleldeitin naqty aiǵaq tabylmaǵan.
Sondyqtan Hoiermann qylmystaryn moiyndaǵanymen, Long-Ailendtegi 30 jylǵa sozylǵan jumbaq kisi óltirýlerdiń qupiiasy áli tolyq ashylǵan joq.
