Charlz Menson eshkimdi óz qolymen óltirmese de, onyń aty HH ǵasyrdaǵy eń qatygez qylmystardyń simvolyna ainaldy, dep habarlaidy ult.kz.
Charlz Menson - HH ǵasyrdaǵy eń qatygez ári eń tanymal qylmyskerlerdiń biri. Ol 2017 jyly 83 jasynda Kaliforniia shtatyndaǵy aýrýhanada qaitys boldy. Menson ómir boiyna bas bostandyǵynan aiyrylǵan edi.
Ol 1960-jyldary ózi qurǵan «Otbasy» (Family) qaýymdastyǵy músheleri jasaǵan qatygez kisi óltirýlerden keiin tanymal boldy. Qaýymdastyq The Beatles ánderin óz betinshe burmalap, olarda násilder arasyndaǵy qaqtyǵys týraly jasyryn úndeý bar dep sengen.
Mensonǵa qatysty eń shýly qylmystardyń biri - 1969 jyly boldy. Sol jyly kinorejisser Roman Polanskidiń jubaiy, aktrisa Sheron Teit qaza tapty. Ol júktiliktiń segizinshi aiynda bolǵan. Sol túni Menson toby taǵy tórt adamdy óltirgen.
Bári qalai bastaldy?
Charlz Menson 1934 jyly 12 qarashada AQSh-tyń Tsintsinnati qalasyndaǵy memlekettik aýrýhanada dúniege kelgen. Anasy Ketlin Meddoks nebári 16 jasta bolǵan. Týǵan kezde oǵan «aty joq Meddoks» (no name Maddox) degen esim berilgen. Bir aptadan keiin ǵana oǵan Charlz Millz Meddoks degen esim qoiyldy.
Ákesi kim ekeni áli kúnge deiin belgisiz. Mensonnyń balalyq shaǵy aýyr ótken. Anasy túrmege túsip, ózi tárbiesi qiyn balalarǵa arnalǵan arnaiy mekemelerde tárbielengen. Ol jerden jii qashyp ketip, kólik pen velosiped urlaǵan.
20 jasynda Mensonnyń alǵashqy qylmystyq áreketti bastaldy. Ol osy áreketteri úshin alǵashynda shartty jaza alǵan, keiin 10 jylǵa sottalǵan. Onyń segiz jylyn ótep, 1967 jyly bostandyqqa shyqqan.
Mensonnyń estelikterine qaraǵanda, ol qurbysy Meri ekeýi Kaliforniiany aralap júrgende, qoǵamnan óz ornyn taba almaǵan jastar oǵan kele bastaǵan. Olar «Otbasy» qaýymynyń múshesine ainalyp, bir-birin «aǵa», «qaryndas» dep atap, jańa esimder alǵan.
Olardyń negizgi mekeni Spen ranchosy bolǵan. Buryn ol jer vestern filmderin túsirý úshin paidalanylǵan. Ranchoda «Otbasy» qaýymdastyǵynyń músheleri án aityp, toptyq jynystyq qatynasqa túsip, «shaitanǵa qulshylyq» rásimderin ótkizip, esirtki qoldanǵan. Sonymen qatar janýarlardy soiyp, qanyn ishkeni aitylǵan.
Eń atyshýly qylmys
Menson tobynyń alǵashqy qurbandarynyń biri aktrisa Sheron Teit boldy. Onymen birge onyń dostary Djei Sebring, Voitek Frikovski jáne Ebigeil Folger de óltirildi. Keiinirek kelgen Stiven Perent te qaza tapqan.
Qurbandar asa qatygezdikpen óltirilgen. Olardy pyshaqpen aiaýsyz tilgilegen. Jalpy sany júzden astam pyshaq jaraqaty salynǵan.
Málimetke sáikes, qylmys bolǵan kúni úidiń kireberis esigi ashyq qalǵan. Esiktiń tómengi jaǵyna qanmen «Pig» («dońyz») degen sóz jazylǵan. Bul Sheron Teittiń qany bolǵan. Saraptama qorytyndysynda Teittiń denesinen 16 pyshaq jaraqaty tabylǵany, onyń beseýi ólimge ákelgeni kórsetilgen.
Osydan keiin Los-Andjelestegi tanymal shashtaraz, kofehana iesi jáne taǵy basqa adamdar da óltirildi. Politsiia «Otbasy» qaýymdastyǵy múshelerin túgel ustady. Olardy ólim jazasynan Kaliforniia shtatynda 1972 jyly bul jaza joiylǵany ǵana qutqaryp qaldy. Nátijesinde sot Mensonǵa toǵyz márte ómir boiy bas bostandyǵynan aiyrý jazasyn taǵaiyndady.
Menson men onyń toby sot zalynda otyrǵan kezde, bostandyqta qalǵan jaqtastary oǵan taǵaiyndalǵan advokatty óltirip ketken.
Ózderine qatysty aqparattyń BAQ-ta keń taraýyna narazylyq retinde Menson men onyń izbasarlary mańdailaryna svastika belgisin salǵan. Menson sol tyrtyqpen ómiriniń sońyna deiin júrgen.
Túrmede otyrǵan kezinde Menson 13 ret shartty túrde merziminen buryn bosatýdy surap ótinish bergen. Biraq ár joly bas tartý alǵan. Túrmede ótkizgen jyldary ol ózin hristian belsendisi retinde tanytyp, «Will You Die For Me?» (Men úshin ólýge daiynsyń ba?) atty avtobiografiia jazǵan. Sonymen qatar úilenip, tórt balanyń ákesi atanǵan jáne jeke veb-sait ashqan.
Qyzyqty derek: rok ánshisi Marilyn Manson óziniń sahnalyq laqap aty úshin «Menson» tegin Charlz Mensonnan, al «Merilin» esimin Merilin Monrodan alǵan. Ánshiniń aitýynsha, ol osylaisha «amerikalyq mádeniettiń eki simvolyn» biriktirgen.
Kisi óltirýshiniń denesi krematsiialanǵan
Charlz Menson 2017 jyldyń qarashasynda 83 jasynda Kaliforniiadaǵy aýrýhanada qaitys boldy. Keiin onyń denesin kim alatynyna qatysty daý týyndaǵan. Aqyry sot sheshimimen máiit Mensonnyń nemeresimin degen Djeison Frimenge berildi.
Seriialyq qylmyskermen qoshtasý rásimi Kaliforniia shtatyndaǵy Portervil qalasyndaǵy jerleý zalynda ótken. Rásimge shamamen 20-25 adam, onyń ishinde Mensonnyń týystary men dostary qatysqan. Qoshtasý sáti Mensondar áýleti týraly derekti film úshin videoǵa túsirilgen. Rásimnen keiin Mensonnyń denesi krematsiialanyp, kúli belgisiz jerde shashylǵan.
