13 جىل بويى اقش-تىڭ فەدەرالدىق تەرگەۋ بيۋروسى مەن نيۋ-يورك شتاتىنىڭ پوليتسيياسى ەل تاريحىنداعى ەڭ جۇمباق سەرييالىق كٸسٸ ٶلتٸرۋلەردٸڭ بٸرٸن تەرگەدٸ. 2010 جىلدىڭ جەلتوقسانى مەن 2011 جىلدىڭ سەۋٸرٸ ارالىعىندا لونگ-ايلەند ارالىنان سەگٸز سەكس-قىزمەتكەردٸڭ مەيٸتٸ تابىلعان. الايدا بۇل قىلمىستارعا كٷدٸكتٸ ادام 2023 جىلى بٸر-اق انىقتالدى. ول ارحيتەكتۋرالىق بيۋرو يەسٸ رەكس حويەرمانن بولىپ شىقتى. ول ٶز قىلمىسىن 2026 جىلدىڭ 8 سەۋٸرٸندە بٸر-اق مويىندادى, دەپ حابارلايدى ult.kz.
يت ەرتكەن ادام
16 جىل بۇرىن پوليتسييا بٸرنەشە ادام ٶلٸمٸنە بايلانىستى قورقىنىشتى ٸستٸ تەرگەي باستادى. كەيٸن بۇل قىلمىستاردىڭ ٸزٸ 1990 جىلدارعا دەيٸن بارىپ تٸرەلەتٸنٸ بەلگٸلٸ بولدى.
2010 جىلدىڭ 1 مامىرىندا لونگ-ايلەندتەگٸ وۋك-بيچ اۋدانىندا سەكس-قىزمەتكەر شەننون گيلبەرت جوعالىپ كەتكەن. سول تٷنٸ ول كليەنتٸنٸڭ ٷيٸنەن قورقىپ جٷگٸرٸپ شىعىپ, كٶرشٸلەردەن كٶمەك سۇراعان. ارتىنشا 911 قىزمەتٸنە قوڭىراۋ شالىپ, ٶزٸن بٸرەۋ اڭدىپ جٷرگەنٸن جەنە ٶلتٸرەيٸن دەپ جٷرگەنٸن ايتقان. وسىدان كەيٸن شەننوندى ەشكٸم كٶرمەگەن.
911 وپەراتورى شەننون گيلبەرتتٸڭ بٸرەۋدٸڭ كٶمەگٸنەن باس تارتقانىن ەستٸگەن. وقيعا ورنىنا كەلگەن پوليتسەيلەر ونىڭ جەڭگەتايىمەن, كليەنتٸمەن جەنە كٶرشٸسٸمەن سٶيلەسكەن. ولاردىڭ ايتۋىنشا, شەننون ٶزٸن وعاش ۇستاپ, قاتتى قورقىپ جٷرگەن. كەيٸن ول قاراڭعى جاققا قاراي جٷگٸرٸپ كەتكەن, سودان كەيٸن ونى ەشكٸم كٶرمەگەن.
2010 جىلدىڭ 11 جەلتوقسانىندا كينولوگ دجون ماللييا مەن ونىڭ بليۋ اتتى قىزمەتتٸك يتٸ شەننوندى ٸزدەۋ كەزٸندە وۋشەن-پاركۆەي جولىنىڭ ماڭىنان ادام سٷيەكتەرٸن تاپقان. سٷيەكتەر شٸرٸپ كەتكەن قاپقا ورالعان. وسىدان كەيٸن پوليتسييا ماڭايدى تولىق تەكسەرە باستاعان. ەكٸ كٷننەن كەيٸن العاشقى جەردەن شامامەن 400 مەتر قاشىقتىقتان تاعى ٷش ەيەلدٸڭ مەيٸتٸ تابىلدى.
ساراپشىلاردىڭ ايتۋىنشا, العاش تابىلعان سٷيەكتەر 2009 جىلى جوعالىپ كەتكەن 24 جاستاعى سەكس-قىزمەتكەر مەليسسا بارتەلەميگە تيەسٸلٸ بولعان. ال جاقىن ماڭنان مورين برەينارد-بارنس, مەگان ۋوتەرمان جەنە ەمبەر كوستەللونىڭ دەنەلەرٸ شىققان. بۇل ەيەلدەردٸڭ بەرٸ 2007–2010 جىلدارى جوعالىپ كەتكەن.
2010 جىلدىڭ 14 جەلتوقسانىندا ساففولك وكرۋگٸنٸڭ پوليتسيياسى بۇل ايماقتا سەرييالىق قىلمىسكەر بولۋى مٷمكٸن ەكەنٸن مەلٸمدەدٸ. كەيٸن بۇل تٶرت ەيەل «گيلگو تٶرتتٸگٸ» دەپ اتالدى.
الايدا قورقىنىشتى جەيتتەر مۇنىمەن توقتامادى. 2011 جىلدىڭ ناۋرىزىندا سول ماڭنان 2003 جىلى ٶلتٸرٸلگەن دجەسسيكا تەيلوردىڭ باس سٷيەگٸ مەن قولدارى تابىلدى. ال سەۋٸر ايىندا گيلگو جاعاجايىنان 2000 جىلى ٶلتٸرٸلٸپ, دەنەسٸ بٶلشەكتەلگەن ۆالەري ماكتىڭ سٷيەگٸنٸڭ قالدىقتارى شىققان. كٶپ ۇزاماي سول جەردەن 1996 جىلى قازا تاپقان كارەن ۆەرگاتانىڭ قاڭقاسى دا تابىلدى. بٸر سٶزبەن ايتقاندا, ماللييا مەن ونىڭ يتٸ بليۋ مانياكتىڭ ٶز قولىمەن جاساعان تۇتاس «زيراتىن» تاۋىپ العان.
جاعدايدى ودان سايىن ٷرەيلٸ ەتكەنٸ ۆالەري ماكتىڭ قاسىندا ەكٸ جاسار قىزدىڭ سٷيەگٸ جاتقان. 2025 جىلى ونىڭ 1997 جىلى جوعالىپ كەتكەن تانيا دجەكسوننىڭ قىزى ەكەنٸ انىقتالدى. كەيٸنٸرەك سول اۋماقتان ازييالىق جٸگٸتتٸڭ مەيٸتٸ دە تابىلدى. ونىڭ كٸم ەكەنٸ ەلٸ كٷنگە دەيٸن بەلگٸسٸز.
تەرگەۋ
پوليتسييا بۇل قىلمىستاردىڭ بٸر-بٸرٸمەن بايلانىستى ەكەنٸن ۇزاق ۋاقىت بويى انىقتاي الماعان. سەبەبٸ مەيٸتتەر مەن دەنە بٶلٸكتەرٸ ەر جىلدارى تابىلعان. ونىڭ ٷستٸنە جوعالعان ەيەلدەردٸڭ بەرٸ سەكس-قىزمەتكەر بولعاندىقتان, ول كەزدە قۇقىق قورعاۋ ورگاندارى مۇنداي ٸستەرگە اسا مەن بەرمەگەن.
تٸپتٸ كەي ادامدار ولار باسقا قالاعا جۇمىس ٸستەۋگە كەتكەن بولۋى مٷمكٸن دەپ ويلاعان. كەي جاعدايدا تۋىستارى دا ولاردىڭ جوعالعانىن پوليتسيياعا بٸردەن حابارلاماعان.
سوعان قاراماستان, تەرگەۋ بٸرتٸندەپ جالعاسقان. بٸراق بۇل ٸستە كٷمەندٸ جاعدايلار دا بولعان.
2010–2011 جىلدارى تابىلعان مەيٸتتەردٸڭ كٶبٸ ساففولك وكرۋگٸنەن شىققان. 2012 جىلى وسى وكرۋگتٸڭ پوليتسييا باسشىسى بولىپ دجەيمس بەرك تاعايىندالدى. ول بۇعان دەيٸن نيۋ-يورك پوليتسيياسىندا جٷرگەن كەزٸندە قىزمەتتٸك ٶكٸلەتٸن اسىرا پايدالاندى دەگەن داۋعا ٸلٸنگەن.
كەيٸن ونى باسقا ايماققا اۋىستىرعانىمەن, جاڭا قىزمەتٸندە دە مەسەلەلەر تۋىنداعان. بەرك فەدەرالدىق تەرگەۋ بيۋروسىنىڭ (FBI) بۇل ٸسكە ارالاسۋىنا قارسى بولعان. سەبەبٸ فەدەرالدىق اگەنتتەر ٶزٸنٸڭ زاڭسىز ەرەكەتٸن دە انىقتاپ قويۋى مٷمكٸن دەپ قورىققان. اقىرى سولاي بولدى. كەيٸن بەركتٸڭ ۇستالعان ادامداردى ۇرىپ-سوعىپ, دەلەلدەردٸ قولدان جاساعانى بەلگٸلٸ بولىپ, قىزمەتٸنەن قۋىلعان.
لونگ-ايلەندتەگٸ مانياك تۋرالى ٸس تەك 2022 جىلى قايتا قارقىن الدى. سول كەزدە وكرۋگ پروكۋرورى ارنايى تەرگەۋ توبىن قۇرعان. ول ۋاقىتتا تەرگەۋشٸلەردٸڭ قولىندا كٷدٸكتٸنٸ انىقتاۋعا كٶمەكتەسەتٸن بٸرنەشە ماڭىزدى دەلەل بولعان. ولار ۇيالى تەلەفونداردىڭ قاي جەردە بولعانىن تەكسەرگەن, قۇرباندار كٸممەن بايلانىسقا شىققانىن زەرتتەگەن. سونىمەن قاتار كەي مەيٸتتەردٸڭ جانىنان تابىلعان شاش نەمەسە باسقا بيولوگييالىق ٸزدەردەن دنق ساراپتاماسى جاسالعان.
كٷدٸكتٸ
2023 جىلى تەرگەۋشٸلەر كٷدٸكتٸلەر قاتارىن بٸرنەشە ادامعا دەيٸن قىسقارتتى. سول جىلدىڭ 13 شٸلدەسٸندە 59 جاستاعى ارحيتەكتور رەكس حويەرمانن ۇستالدى. ول 1993 جىلى نورت-سي اۋدانىنان دەنەسٸ تابىلعان ساندرا كوستيليانىڭ ٶلٸمٸنە كٷدٸكتٸ رەتٸندە تانىلدى. تەرگەۋشٸلەر ونىڭ دەنەسٸنەن حويەرمانننىڭ شاشىن تاپقان.
ارحيتەكتور مانحەتتەندە جۇمىس ٸستەگەنٸمەن, لونگ-ايلەندتەگٸ ماسساپەكۋا-پارك قالاشىعىندا تۇرعان. قۇربانداردىڭ دەنەلەرٸ دەل وسى ماڭنان تابىلعان. حويەرمانن بويى 193 سانتيمەتر, سالماعى 100 كەلٸدەن اساتىن ٸرٸ دەنەلٸ ادام بولعان. ونىڭ ٶمٸربايانىن بٸلگەن كٶپشٸلٸك «مانياكتار دەل وسىنداي بولادى» دەگەن پٸكٸر ايتقان.
ول 1963 جىلى لونگ-ايلەندتە دٷنيەگە كەلگەن. ەكەسٸ اەروعارىش سالاسىنىڭ ينجەنەرٸ بولعان. مەكتەپتە ونى بويىنىڭ ۇزىندىعى, ارتىق سالماعى جەنە تۇيىق مٸنەزٸ ٷشٸن قاتارلاستارى جيٸ مازاقتاعان. بٸراق ول ٶزٸن قورعاي بٸلەتٸن ادام بولعان. حويەرمانن نيۋ-يورك تەحنولوگييالىق كوللەدجٸن ارحيتەكتۋرالىق تەحنولوگييا ماماندىعى بويىنشا تەمامداپ, كەيٸن RH Consultants & Associates كومپانيياسىن قۇرعان. فيرما ەسكٸ عيماراتتاردى قايتا جٶندەۋ, زاڭدىق مەسەلەلەردٸ شەشۋ سيياقتى جۇمىستارمەن اينالىسقان.
«مەن ارحيتەكتۋرالىق مەسەلەلەردٸ شەشەمٸن. قۇرىلىس دەپارتامەنتٸمەن كەلٸسسٶز جٷرگٸزەمٸن. قاراپايىم بولۋى تيٸس جۇمىس كٷردەلەنە باستاسا, ادامدار ماعان حابارلاسادى», - دەدٸ ول.
ول بۇل سٶزدەردٸ 2022 جىلى YouTube-تاعى Bonjour Realty ارناسىنا بەرگەن سۇحباتىندا ايتقان.
حويەرمانننىڭ بيزنەسٸ تابىستى بولعان. ونىڭ كليەنتتەرٸ قاتارىندا American Airlines مەن نيۋ-يورك قالاسىنىڭ قورشاعان ورتانى قورعاۋ دەپارتامەنتٸ بولعان. 1990 جىلى ول اسا ەللورۋپقا ٷيلەنٸپ, كەيٸن قىزى دٷنيەگە كەلگەن. قىزى ۋنيۆەرسيتەتتەن كەيٸن ەكەسٸنٸڭ كومپانيياسىندا جۇمىس ٸستەي باستاعان. كٶرشٸلەرٸنٸڭ بٸر بٶلٸگٸ ونى «ٷنسٸز جٷرگەنٸمەن قاۋٸپتٸ ادام» دەپ سيپاتتاعان.
بٸر كٶرشٸسٸ حويەرمانننىڭ وتىن جارىپ تۇرعانىن كٶرٸپ, امانداسقانىن ايتادى. ارحيتەكتور وعان ٷرەيلٸ كٶزقاراسپەن قاراپ, بالتانىڭ سابىن قىسا تٷسكەن. وسىدان كەيٸن كٶرشٸسٸ وعان جاقىنداماۋعا تىرىسقان. ال كەيبٸرەۋلەر ونى قاراپايىم, سەل ٸش پىستىراتىن, بٸراق زييانسىز ادام دەپ سيپاتتاعان.
ەرٸپتەستەرٸنٸڭ پٸكٸرٸ دە ەكٸگە بٶلٸنگەن. بٸرٸ ونى ٶتە بٸلٸكتٸ مامان دەسە, ەندٸ بٸرٸ سۋىق, تەكاپپار جەنە ٶزٸن بەرٸنەن اقىلدى سانايتىن ادام رەتٸندە ەسكە العان.
مانياكتىڭ وتباسى
حويەرماننىڭ ەيەلٸ مەن قىزى وعان باستاپقىدا تاعىلعان ايىپتارعا سەنبەگەن. جارى اسا ەللورۋپ جولداسىنا دەگەن سەنٸمٸ جىلدار بويى سٶنبەيتٸنٸن ايتقان.
«ولار ونى سەكس-قىزمەتكەرلەرمەن جٷرگەن دەيدٸ. نە دەگەن سٶز? مەن كٷيەۋٸمدٸ قاناعاتتاندىرمايمىن با? ول كٷن سايىن ٷيگە كەلٸپ, مەن دايىنداعان كەشكٸ استى ٸشەدٸ. بۇل جەتكٸلٸكسٸز بە? جوق, مەن ونىڭ قىلمىسكەر ەكەنٸنە سەنبەيمٸن», - دەيدٸ حويەرماننىڭ جارى.
قىزى ۆيكتورييا دا ەكەسٸن ەشقاشان قاتىگەز ادام دەپ ويلاماعانىن ايتقان. ونىڭ سٶزٸنشە, ەكەسٸ ولارعا قول كٶتەرمەگەن, اشۋلانسا تەك ىدىستى قاتتىراق لاقتىراتىن بولعان.
سوعان قاراماستان, حويەرمانن جەرتٶلەدە 279 قارۋدان تۇراتىن ٷلكەن ارسەنال ساقتاعان. ول اڭشىلىقتى جاقسى كٶرگەن. الايدا مۇنى ونىڭ تۋىستارى عانا بٸلگەن.
تەرگەۋ دەرەگٸنشە, شابۋىلداردىڭ كٶبٸ ەيەلٸ مەن قىزى دەمالىسقا كەتكەن كەزدە جاسالعان.
كٸنەنٸ دەلەلدەيتٸن ايعاقتار
تەرگەۋشٸلەردٸڭ ايتۋىنشا, حويەرمانن بٸر رەتتٸك تەلەفوندار ارقىلى قۇربانداردىڭ كەمٸندە ٷشەۋٸمەن بايلانىسقان. كوستيليانىڭ دەنەسٸنەن تابىلعان شاشتار دا وعان تيەسٸلٸ بولۋى مٷمكٸن دەگەن بولجام ايتىلدى. ال مورين برەينارد-بارنستى بايلاعان بەلدٸكتەردٸڭ بٸرٸنەن ونىڭ ەيەلٸ اسا ەللورۋپتىڭ دنق-سى تابىلعان.
كەي قىزدار جوعالار الدىندا ولاردىڭ تەلەفونى مەن حويەرمانن ساتىپ الدى دەلٸنگەن بٸر رەتتٸك تەلەفوندار بٸر جەردە بولعان. قۇرباندار جوعالعان سوڭ ولاردىڭ تۋىستارى مەن دوستارىنا بەلگٸسٸز ادام قوڭىراۋ شالعان. مەليسسا بارتەلەميدٸڭ اناسىنا ەلدەبٸرەۋ بٸرنەشە رەت حابارلاسىپ, سوڭعى سٶيلەسۋدە:
«مەن ونى ٶلتٸردٸم», - دەپ ايتقان.
ول بۇل قوڭىراۋدى مانحەتتەننٸڭ قاق ورتاسى تايمس-سكۆەردەن جاساعان. دەل سول جەردە حويەرمانننىڭ كەڭسەسٸ ورنالاسقان.
سونىمەن قاتار ەمبەر كوستەللونى ٷيٸنەن الىپ كەتكەن كليەنت نيۋ-يوركتە سيرەك كەزدەسەتٸن Chevrolet Avalanche پيكابىمەن جٷرگەن. دەل سونداي كٶلٸك حويەرمانندا بولعان.
حويەرمانن اقىرى بەرٸن مويىندادى
قورعاۋشىلار دنق دەلەلدەرٸنە كٷمەن كەلتٸرگەن. بيوماتەريالدار پيتستسا قورابىنداعى قامىر قالدىقتارىنان الىنعانى ايتىلدى. ادۆوكاتتار مۇنى زاڭسىز دەلەل دەپ اتادى.
كوستيليا دەنەسٸنەن تابىلعان شاشتاردىڭ تٷبٸ بولماعاندىقتان, دنق الۋ مٷمكٸن ەمەس دەگەن پٸكٸر دە ايتىلدى.
حويەرمانننىڭ ادۆوكاتتارى پوليتسييا ونى بۇل ٸسكە ەڭ قولايلى كٷدٸكتٸ رەتٸندە قاراستىرعانىن ايتقان. سەبەبٸ ول مەيٸتتەر تابىلعان جەرگە جاقىن تۇرعان, كٶرشٸلەرٸ ول تۋرالى كٷمەندٸ پٸكٸر ايتقان جەنە ٷيٸندە كٶپ قارۋ ساقتالعان.
الايدا 2026 جىلدىڭ 8 سەۋٸرٸندە بۇل كٷمەندەردٸڭ بەرٸنە حويەرمانننىڭ ٶزٸ نٷكتە قويدى. سوتتا ول ۋوتەرمان, بارتەلەمي, كوستەللو, برەينارد-بارنس, ماك, تەيلور, كوستيليا جەنە ۆەرگاتانى ٶلتٸرگەنٸن مويىندادى. سۋديا ودان ەيەلدەردٸ قالاي ٶلتٸرگەنٸن سۇراعاندا, حويەرمانن سەگٸز رەت:
«تۇنشىقتىردىم», - دەپ جاۋاپ بەرگەن.
ەڭ قىزىعى, سوڭعى قۇربان بويىنشا وعان رەسمي ايىپ تاعىلماعان ەدٸ. بٸراق سوعان قاراماستان ول بۇل قىلمىستى دا ٶزٸ جاساعانىن مويىنداعان. تەرگەۋشٸلەر ونىڭ نە ٷشٸن بۇلاي ٸستەگەنٸن ەلٸ كٷنگە دەيٸن تٷسٸنە الماي وتىر. حويەرمانن ەندٸ ٶمٸرٸنٸڭ سوڭىنا دەيٸن تٷرمەدە بولادى.
سونىمەن قاتار بۇل ٸس بويىنشا ەلٸ دە جاۋاپسىز قالعان سۇراقتار كٶپ. تانيا دجەكسون مەن ونىڭ قىزىن كٸم ٶلتٸرگەنٸ بەلگٸسٸز كٷيٸندە قالىپ وتىر. وۋشەن-پاركۆەي اۋماعىنان تابىلعان ازييالىق جٸگٸتتٸڭ ٶلٸمٸ دە ەلٸ اشىلماعان.
ال بەرٸنٸڭ باستالۋىنا سەبەپ بولعان شەننون گيلبەرتتٸڭ سٷيەگٸ 2011 جىلدىڭ جەلتوقسانىندا باتپاقتان تابىلعان. تەرگەۋشٸلەر ونىڭ سۋعا باتىپ قايتىس بولعانىن ايتقان. الايدا تۋىستارى شەننوندى دا حويەرمانن ٶلتٸردٸ دەپ ەسەپتەيدٸ. بٸراق ونى دەلەلدەيتٸن ناقتى ايعاق تابىلماعان.
سوندىقتان حويەرمانن قىلمىستارىن مويىنداعانىمەن, لونگ-ايلەندتەگٸ 30 جىلعا سوزىلعان جۇمباق كٸسٸ ٶلتٸرۋلەردٸڭ قۇپيياسى ەلٸ تولىق اشىلعان جوق.
