قۇرمەتتٸ مەشھٷر اعا!
سٸزگە ٷلكەن ۇياتتى بولدىم. نە دەپ عافۋ ٶتٸنەم دەسەم دە, ول ٶتٸنٸشٸم تٷككە تۇرمايدى. ٶيتكەنٸ ەكٸ حاتىڭىزعا بٸردەي جاۋاپ قايىرا الماعانىم كەشٸرٸلمەيتٸن كٷنە بولدى. رەنجٸگەن شىعارسىز, تەك قارعاماساڭىز بولادى. بوقتاۋعا, ۇرسۋعا, ۇرۋعا مويىنىمدى ۇسىنىپ تۇرمىن.
ەكٸ جارىم اي بولدى, ٷيدەن تٷزگە شىقپاعانىما. نە ٸستەدٸڭ دەسەڭٸز, "قىلۋاتتا" جاتىپ بٸر رومان جازىپ بٸتٸردٸم, ٶزٸڭٸز كٶرگەن "قارتقوجادان" ٷلكەندٸگٸ - ەكٸ ەسە ٷلكەن بولادى. بار ويىم, ىنتام, رۋحىم سول رومانعا كەتٸپ, تاپ جىندى كٸسٸدەي بولىپپىن, دوستى, جولداستى, قۇرمەتتٸ قىمبات اعانى ۇمىتىپ كەتە جازداپپىن. مەن كٷندٸ قالاي ٶتكٸزەدٸ دەسەڭٸز, مٸنە, بىلاي: تاڭەرتەڭ ساعات سەگٸزدە تۇرامىن دا, شاي ٸشٸپ, قىزمەتكە بالا وقىتۋعا كەتەمٸن. كٷنٸنە التى ساعات بالا وقىتامىن. ساعات ٷشتە ٷيگە كەلەمٸن, تاماق ٸشەمٸن. ودان كەيٸن ۇيىقتايمىن. ساعات التى-جەتٸلەردە ويانامىن. شاي ٸشەمٸن. سٷيتەم دە جازۋعا وتىرامىن. سول وتىرعاننان تٷنگٸ ساعات ەكٸ-ٷشكە دەيٸن وتىرىپ قالام. ەبدەن تالعاندا بارىپ ۇيىقتايمىن. مٸنە, ەكٸ جارىم ايداي كٶرگەن ٶمٸرٸم - وسى.
بٸراق بۇل كٷندە رومانىم بٸتتٸ.
سٸزدٸڭ سوڭعى حاتىڭىزدى العانىما ەكٸ-ٷش كٷن بولدى. سودان بەرٸ ناسىباي جٸبەرۋگە بٷگٸن عانا قول تيٸپ وتىر. بٶتەلكەلەر اۋىر تارتاتىن بولعان سوڭ اۋا, سۋ ٶتپەيتٸن قاعازدان قالتا قىلىپ سالدىم. ناسىباي بۇزىلمايدى دەپ ەركٸمدەر ايتادى. قالاي جەتكەنٸن بارىسىمەن بٸلدٸرەرسٸز. ناسىبايدى قامالدان بايجانوۆ ارقىلى جٸبەرٸپ وتىرمىن.
سوڭعى حاتىڭىزدا جٸبەرەتٸن سٶزدەر دايارلاپ قويدىم دەگەن ەكەنسٸز. ولارىڭىزدى جٸبەرە بەرٸڭٸز. باسىلۋ جاعىنا سٶيلەسٸپ كٶرەمٸن. تٷگەل باسىلىن كٸتاپ بولىپ شىقسا, تٸپتٸ جاقسى, ەيتپەسە, جۋرنالدارعا بٶلشەكتەپ باسىپ وتىرساق تا جارار. ەرينە, ٶز اتىڭىزبەن باسىلۋى كەرەك. ەندٸگٸ مٸندەت: سٸزدٸڭ اتىڭىزدى تاريحتا قالدىرۋعا قولدان كەلگەنشە جەردەم ەتۋ. ونى ورىنداي الام با, جوق پا?! بٸلمەيمٸن. ٶيتكەنٸ ەسكٸ سٶزدٸڭ, بۇرىنعى اقىننىڭ قادٸرٸن بٸلەتٸندەر ازايىپ بارادى.
قالامعا جارماسقانىڭىزدى ەستٸپ قاتتى قۋاندىم. تولستوي سەكسەنگە كەلگەنشە جازعان عوي. ەركٸمنٸڭ ٶز تولستويى ٶزٸنە-داعى. تەك ٶمٸرلٸ بولعاي دەڭٸز.
انىق ادرەسٸڭٸزدٸ كٶرسەتٸڭٸز, بۇدان بىلاي بٸر-اق ادرەسپەن جازاتىن بولايىن.
مەنٸڭ ادرەسٸم: شىمكەنت. پەدتەحنيكۋم. ماعان.بالالار تٷگەل ساۋ, وقىپ جٷر.ساۋلىعىڭىزعا تٸلەكتەس ٸنٸڭٸز.
ەسەت اقمولدانىڭ فەيسبۋكتاعى پاراقشاسىنان الىندى
