تٷركٸستانداعى «فاراب» كٸتاپحاناسىندا مەملەكەت جەنە قوعام قايراتكەرٸ دٸنمۇحامەد قوناەۆتىڭ 110 جىلدىعىنا ارنالعان «دٸنمۇحامەد احمەتۇلى قوناەۆ جەنە ونىڭ دەۋٸرٸ» تانىمدىق كونفەرەنتسيياسى ٶتتٸ, دەپ حابارلايدى «ۇلت اقپارات» وبلىس ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
وعان ەلٸمٸزدٸڭ تٷكپٸر-تٷكپٸرٸنەن عالىمدار مەن زەرتتەۋشٸلەر, زييالى قاۋىم ٶكٸلدەرٸ جەنە قوعام قايراتكەرلەرٸ, ەل اعالارى مەن جاستار قاتىستى. قوناقتار «التى الاشتىڭ الاتاۋى» اتتى كٸتاپ كٶرمەسٸن جەنە «وڭتٷستٸكفيلم» مەكەمەسٸنٸڭ دەرەكتٸ فيلمٸن تاماشالادى. تٷركٸستان وبلىسىنىڭ ەكٸمٸ دارحان ساتىبالدى كٶرنەكتٸ مەملەكەت قايراتكەرٸ تۋرالى وي قوزعاپ, كونفەرەتسنييا جۇمىسىنا سەتتٸلٸك تٸلەدٸ.
«قازاق حالقىنىڭ جارقىن بولاشاعى ٷشٸن ايانباي ەڭبەك تۇلعالاردىڭ بٸرٸ – دٸنمۇحامەد احمەتۇلى قوناەۆ. پاراساتى بيٸك تۇلعا ۇلتقا قىزمەت ەتۋدٸڭ ٷلگٸسٸن كٶرسەتە بٸلدٸ. كٶركەم مٸنەزٸمەن, قاراپايىم بولمىسىمەن, اڭىزعا اينالعان ادالدىعىمەن ەل جٷرەگٸندە مەڭگٸ قالدى. جوعارى جاۋاپكەرشٸلٸك پەن تەرەڭ بٸلٸمٸنٸڭ ارقاسىندا ٶنەگە بولعان ەڭبەك جولىندا حالىقتىڭ قولايلى ٶمٸر سٷرۋٸنە مٷمكٸندٸك تۋدىردى. سول ۋاقىتتاردا دا بٸزدٸڭ ٶڭٸرگە دە ٶزگەشە سەرپٸن بەرٸپ, يگٸلٸكتٸ ٸستەر اتقاردى. دٸنمۇحامەد احمەتۇلى تٷركٸستانعا كەلگەن سايىن ياساۋي كەسەنەسٸنە بارىپ قۇران باعىشتاۋدى ەدەتكە اينالدىرعان ەكەن. بٷگٸنگٸ تٷركٸستاندى دامىتۋ جۇمىستارى سول ۋاقىتتارداعى قاسيەتتٸ قالامىزعا دەگەن ەرەكشە قامقورلىقتىڭ زاڭدى جالعاسى دەپ بٸلەمٸن. سوندىقتان بۇل شارانىڭ قاسيەتتٸ قالامىزدىڭ تٶرٸندە ٶتۋٸ», – زاڭدىلىق دەدٸ دارحان ساتىبالدى.
كونفەرەنتسييانى ەڭبەك ارداگەرٸ يسمات تۇرسىنقۇلوۆ جٷرگٸزٸپ وتىردى. جيىندا قوعام قايراتكەرٸنٸڭ مەملەكەتتٸ دامىتۋ جولىندا اتقارعان ٸستەرٸ, ازاماتتىق بولمىسى كەڭٸنەن سٶز بولدى. بەلگٸلٸ جۋرناليست, «قوناەۆتانۋشى» وراز قاۋعاباەۆ «دٸنمۇحامەد احمەتۇلى قوناەۆتىڭ ون ەكٸ قاسيەتٸ جەنە قوناەۆتى ۇلىقتاۋدىڭ جولدارى» تاقىرىبىندا بايانداما جاسادى. تۇلعانىڭ ادالدىعى, قولى مەن ارى تازا بولعانىنا توقتالىپ, قايراتكەردٸڭ تۋعان كٷنٸ جەنە ٶمٸردەن ٶتكەن كٷنٸنە وراي ەسكە الۋ جەنە تانىمدىق ٸس-شارالار ٶتكٸزۋدٸ ۇسىندى.
قازاقستان رەسپۋبليكاسى مەملەكەتتٸك سىيلىعىنىڭ يەگەرٸ, ەكونوميكا عىلىمدارىنىڭ دوكتورى, اكادەميك ورازالى سەبدەن دٸنمۇحامەد احمەتۇلىنىڭ ينجەنەرلەر مەن عالىمدار, جۇمىسشىلار لەگٸن دايارلاپ شىعۋداعى ەرەن ەڭبەگٸن اتاپ ٶتتٸ. كٶشباسشى اتىندا مەملەكەتتٸك سىيلىق تاعايىندالسا دەگەن ۇسىنىسىن جەتكٸزدٸ. ال د.ا.قوناەۆتىڭ كەڭەسشٸسٸ بولعان, گەنارال-لەيتەنانت امانكەلدٸ شابدارباەۆ ديماش اتانىڭ قازاق قالامگەرلەرٸنە, رۋحانيياتىنا, جاستارىنا قورعان بولعانى تۋرالى تىڭ دەرەكتەردٸ تٸلگە تيەك ەتسە, ٶزگە دە ەڭبەك ارداگەرلەرٸ مەن قاتىسۋشىلار ەستەلٸكتەر ايتتى. ەلگە كٶشباسشى بولعان ازاماتتىڭ ەل ەسٸندە مەڭگٸ ساقتالاتىنىنا سەنٸم بٸلدٸردٸ.
جيىندا حالىقارالىق د.قوناەۆ قوعامدىق قورىنىڭ پرەزيدەنتٸ ەلدار قوناەۆ بٸرنەشە ازاماتقا د.قوناەۆتىڭ 110 جىلدىعىنا ارنالعان وردەندٸ تاپسىردى.
تٷركٸستان تٶرٸندەگٸ كەلەلٸ مەجٸلٸستە ايتىلعان تٷرلٸ ۇسىنىستار مەن كٶتەرٸلگەن باستامالار كونفەرەنتسييانىڭ حاتتاماسىنا ەنگٸزٸلدٸ.
