تٷركٸستان وبلىسىنىڭ ەكٸمٸ دارحان ساتىبالدى ٶڭٸردٸڭ 150-دەن استام بەلسەندٸ جاستارىمەن كەزدەستٸ, دەپ حابارلايدى «ۇلت اقپارات» وبلىس ەكٸمدٸگٸنٸڭ باسپاسٶز قىزمەتٸنە سٸلتەمە جاساپ.
ەركٸن فورماتتا ٶتكەن پٸكٸرلەسۋدە جاستار ٶز ويلارى مەن ۇسىنىستارىن ورتاعا سالدى. جاستارعا سەنٸم ارتاتىنىن ايتقان وبلىس ەكٸمٸ يگٸ ٸستەردٸڭ باسىندا جٷرگەن ۇل-قىزدارعا العىس بٸلدٸردٸ. ٶڭٸردەگٸ جاستار ساياساتىنا ٷلەس قوسۋعا شاقىردى.
«بٷگٸنگٸ كەزدەسۋدە ٶزەكتٸ مەسەلەلەر مەن تىڭ يدەيالارىڭىزدى ورتاعا سالۋعا شاقىرامىن. جاستار اراسىنداعى پروبلەمانى سٸزدەردەن ارتىق ەشكٸم بٸلمەيدٸ. مەسەلەلەر ايتىلىپ, شەشۋ جولدارىن تالقىلايىق. قوعامنىڭ قوزعاۋشى كٷشٸ – جاستار. سٸزدەر بولاشاقتىڭ جاس قۇرىلىسشىسى ەكەندەرٸڭٸزدٸ ەش ۋاقىتتا ەستەن شىعارماۋلارىڭىز كەرەك. بارىمىزدى باعالايىق. بٸلٸم الىڭىزدار, ەڭبەك ەتٸڭٸزدەر, اعا بۋىننىڭ اقىلىنا قۇلاق اسىڭىزدار, ٷزدٸكسٸز ٸزدەنٸستە بولىڭىزدار. جەكە كەسٸپ اشۋعا قۇمار جاستار قاتارى ارتىپ كەلەدٸ. جالىندى جاس ٷشٸن اسۋ اسىپ, ٶتكەلدەردەن ٶتۋ قيىن ەمەس. ەڭ باستىسى, بيٸك ماقسات, مەرتەبەلٸ مٷددە بولۋ كەرەك», – دەدٸ وبلىس ەكٸمٸ دارحان ساتىبالدى.
ەركٸن فورماتتا ٶتكەن كەزدەسۋ ەكٸ ساعاتقا سوزىلدى. كٶپ مەسەلەنٸڭ كٷرمەۋٸ شەشٸلدٸ. جاستار ٶڭٸر باسشىسىنا تٷرلٸ سۇراقتار قويىپ, پٸكٸرلەرٸن بٸلدٸردٸ. جۇمىسپەن قامتۋ, قولجەتٸمدٸ باسپانا مەسەلەسٸن كٶتەردٸ. بٸلٸمدٸ جەتٸلدٸرۋ, جاس كەسٸپكەرلەردٸ قولداۋ, قورشاعان ورتانى قورعاۋ جايلى ايتىلدى. وبلىس ەكٸمٸ جاستارمەن جيٸ جٷزدەسۋگە دايىن ەكەندٸگٸن ايتىپ, كٶتەرٸلگەن تاقىرىپتار اياسىندا جۇمىس ٸستەلەتٸندٸگٸن جەتكٸزدٸ. مۇنداي كەزدەسۋلەر جالعاسىن تابادى.
تٷركٸستان قالاسىندا وبلىستىق جاستار رەسۋرستىق ورتالىعىنىڭ عيماراتى ورنالاسقان. ورتالىقتى ارالاپ كٶرگەن
وبلىس ەكٸمٸ دارحان ساتىبالدى 17 اۋدان, قالا بويىنشا جاستار رەسۋرستىق ورتالىعى باسشىلارىمەن تانىستى. وبلىستىق جاستار رەسۋرستىق ورتالىعىنىڭ باسشىسى ەراسىل تٶلەباەۆ اتقارىلعان جۇمىستاردىڭ ەسەبٸن بەردٸ.
تٷركٸستان ٶڭٸرٸندە 470 مىڭنان اسا جاس بار. بۇل – رەسپۋبليكا جاستارىنىڭ 13%-ى. وبلىس حالقىنىڭ تٶرتتەن بٸرٸن قۇرايتىن جاستاردىڭ 80%-دان استامى اۋىلدا تۇرادى. ولاردىڭ اراسىندا ەرٸكتٸلەر دە بارشىلىق. قوعامدىق جۇمىستارعا ارالاسىپ, تٷرلٸ باعىتتا, تٷرلٸ جاعدايلاردا حالىققا قىزمەت كٶرسەتۋدە.
كەزدەسۋ سوڭىندا وبلىس ەكٸمٸ بەلسەندٸ جاستارمەن بٸرگە اعاش وتىرعىزدى.
