تاليبان اۋعانستان سولتٷستٸگٸندەگٸ پروۆينتسييا ورتالىعىنا شابۋىل جاسادى. بيلٸك كابۋل ەۋەجايىنا سودىرلاردىڭ زىمىران شابۋىلىنان قورعايتىن جاڭا جٷيە ورناتقانىن حابارلادى.
حالىقارالىق كواليتسييا 1 مامىردان باستاپ ەسكەرٸن ەكەتە باستاعالى بەرٸ سوڭعى مەلٸمەتكە قاراعاندا, تەلٸپتەر اۋعانستانداعى 423 اۋداننىڭ ٷشتەن بٸرٸن باسىپ العان. بۇل سودىرلار كابۋل ٷكٸمەتٸن قۇلاتۋى مٷمكٸن دەگەن قورقىنىشتى ٷدەتتٸ.
رەسمي بيلٸكتٸڭ مەلٸمەتٸنە قاراعاندا, 11 شٸلدەدە ٷكٸمەت كٷشتەرٸ تەجٸكستانمەن شەكتەسەتٸن تاحار پروۆينتسيياسىنىڭ ورتالىعى تالۋكانداعى شابۋىلعا تويتارىس بەرە العان.
“قارسىلاستىڭ شابۋىلىنا تويتارىس بەرٸلدٸ, ولار قاتتى زارداپ شەكتٸ, كٶپ شىعىنعا ۇشىرادى. نەتيجەسٸندە قارسىلاس تاراپتىڭ 55 سولداتى وققا ۇشتى, 90 جارالاندى” دەدٸ تاحار گۋبەرناتورى ابدۋللا كارلۋك.
دەگەنمەن گۋبەرناتوردىڭ تۇجىرىمى ەزٸرگە راستالعان جوق. قورعانىس مينيسترٸنٸڭ حابارلاۋىنشا, ٷكٸمەت تالۋكانداعى تاليبان شوعىرلانعان نىساندارعا ەۋەدەن شابۋىل جاساعان. ونداعان سولدات قازا بولعان.
تالۋكان – تاليبان باسىپ الۋعا كٷش سالىپ وتىرعان پروۆينتسييا ورتالىعى. ٶتكەن اپتا باسىندا تاليبان كٷشتەرٸ سولتٷستٸك شىعىستاعى بادگيس پروۆينتسيياسىنىڭ ورتالىعى كالايي-ناۋعا باسىپ كٸرگەن. پوليتسييا مەن قاۋٸپسٸزدٸك كٷشتەرٸن تۇتقىنعا العان. سودىرلار گۋبەرناتوردىڭ كەڭسەسٸن باسىپ الۋعا تىرىسقاننان كەيٸن ٷكٸمەت كٷشتەرٸ ولاردى كەرٸ قايتارعان.
