اقش ەسكەرٸ دٷيسەنبٸ كٷنٸ يراننىڭ وڭتٷستٸگٸندە «ٶزٸن-ٶزٸ قورعاۋ ماقساتىنداعى سوققىلار» جاساعانىن مەلٸمدەدٸ. بۇل تۋرالى اقش ورتالىق قولباسشىلىعى حابارلادى. نىساناعا زىمىران ۇشىرۋ الاڭدارى مەن يران قايىقتارى الىنعان, دەپ حابارلايدى ult.kz Fox News باسىلىمىنا سٸلتەمە جاساپ.
«اقش كٷشتەرٸ بٷگٸن يران كٷشتەرٸ تاراپىنان تٶنگەن قاۋٸپتەن ەسكەرٸمٸزدٸ قورعاۋ ٷشٸن يراننىڭ وڭتٷستٸگٸندە قورعانىس سيپاتىنداعى سوققىلار جاسادى», – دەدٸ اقش ورتالىق قولباسشىلىعى ٶكٸلٸ كاپيتان تيم حوكينس.
ونىڭ ايتۋىنشا, نىسانالاردىڭ قاتارىندا زىمىران ۇشىرۋ الاڭدارى مەن مينا ورنالاستىرۋعا ەرەكەتتەنگەن يران قايىقتارى بولعان.
«اقش ورتالىق قولباسشىلىعى قازٸرگٸ اتىستى توقتاتۋ رەجيمٸ كەزٸندە سابىر ساقتاي وتىرىپ, ٶز كٷشتەرٸن قورعاۋدى جالعاستىرادى», – دەدٸ حوكينس.
اقش شەنەۋنٸگٸنٸڭ مەلٸمەتٸنشە, يراننىڭ ەكٸ قايىعى ورمۋز بۇعازىندا مينا ورناتىپ جاتقان جەرٸنەن بايقالعان. سونىمەن قاتار, يراننىڭ زىمىران كەشەنٸ امەريكالىق ەسكەري ۇشاقتاردى نىساناعا العاننان كەيٸن اقش ەسكەرٸ جاۋاپ قايتارعان.
اقش ەسكەرٸ يسلام رەۆوليۋتسيياسى ساقشىلارى كورپۋسىنىڭ ەكٸ كەمەسٸن جويىپ, سونداي-اق يراننىڭ بەندەر-ابباس قالاسىنداعى جەر-ەۋە زىمىران كەشەنٸنە سوققى جاساعان.
«بۇل قورعانىس ماقساتىنداعى سوققىلار بولدى», – دەدٸ شەنەۋنٸك Fox News ارناسىنا.
ونىڭ ايتۋىنشا, بۇل شابۋىلدار يرانمەن اراداعى اتىستى توقتاتۋ كەلٸسٸمٸنٸڭ بۇزىلعانىن بٸلدٸرمەيدٸ. مۇنى تاعى ەكٸ دەرەككٶز راستاعان.
وسى وقيعادان كەيٸن دٷيسەنبٸ كٷنٸ ورمۋز بۇعازى ماڭىنداعى بٸرنەشە ايماقتا جارىلىستار ەستٸلگەن. جارىلىستاردىڭ بٸرٸ يراننىڭ وڭتٷستٸگٸندەگٸ بەندەر-ابباس قالاسىندا بولعان.
سونداي-اق ستراتەگييالىق ماڭىزى بار سۋ جولىنا جاقىن ورنالاسقان سيريك پەن جاسك ماڭىندا دا جارىلىستار تٸركەلگەن. اقش ٶكٸلٸ قازٸرگٸ ۋاقىتتا امەريكالىق سوققىلاردىڭ «ەزٸرگە توقتاعانىن» مەلٸمدەدٸ.
