فوتو: اشىق دەرەككٶز
يۋن سوك يول ٶمٸر بويىنا باس بوستاندىعىنان ايىرىلدى, دەپ حابارلايدى Ult.kz Yonhap اگەنتتٸگٸنە سٸلتەمە جاساپ.
مەلٸمەتكە سەيكەس, سەۋل ورتالىق اۋداندىق سوتى بۇرىنعى پرەزيدەنتتٸ 2024 جىلى ەلدە ەسكەري جاعداي ەنگٸزۋگە ەرەكەت جاساعانى ٷشٸن كٸنەلٸ دەپ تانىعان. ارنايى پروكۋرورلار ٶلٸم جازاسىن سۇراعانىمەن, سوت ٶمٸر بويى تٷرمە جازاسىن تاعايىندادى.
سوت شەشٸمٸندە ٸستەگٸ نەگٸزگٸ جايت رەتٸندە ەكس-پرەزيدەنتتٸڭ پارلامەنت جۇمىسىن توقتاتۋ ماقساتىندا ەسكەردٸ ۇلتتىق جينالىس عيماراتىنا جٸبەرۋ تۋرالى شەشٸمٸ اتالعان. سوت وتىرىسى بۇرىنعى پرەزيدەنتتٸڭ قاتىسۋىمەن ٶتٸپ, ۇلتتىق تەلەارنالار ارقىلى تٸكەلەي ەفيردە كٶرسەتٸلگەن.
ەسكە سالساق, يۋن سوك يولگە 2024 جىلدىڭ جەلتوقسانىندا يمپيچمەنت جارييالانعان. الايدا ونى قىزمەتٸنەن شەتتەتۋ تۋرالى شەشٸمدٸ سوت 2025 جىلدىڭ سەۋٸرٸندە رەسمي تٷردە راستاعان. بۇعان دەيٸن ونى قاماۋعا الۋعا وردەر بەرٸلگەن. بۇل وڭتٷستٸك كورەيا تاريحىندا قىزمەتتەگٸ پرەزيدەنتتٸڭ العاش رەت تۇتقىندالۋى بولدى.
ايتا كەتەيٸك, وڭتٷستٸك كورەيادا «پرەزيدەنتتٸك قارعىس» دەپ اتالاتىن قۇبىلىس بار. ەل باسشىلارىنىڭ كٶپشٸلٸگٸ قىزمەتٸنەن كەيٸن ٶزدەرٸ نەمەسە جاقىن تۋىستارى تٷرلٸ قىلمىستىق ٸستەرگە, يمپيچمەنتكە, تٶڭكەرٸستەرگە نە ٶزگە دە قايعىلى وقيعالارعا تاپ بولعان. رەسپۋبليكا تاريحى پرەزيدەنت لاۋازىمىنىڭ اسا قاۋٸپتٸ ساياسي مەرتەبە ەكەنٸن كٶرسەتٸپ وتىر.
