بەيجٸڭدەگٸ قىسقى وليمپيادا ويىندارىندا كونكيمەن جٷگٸرۋدەن ەيەلدەر اراسىنداعى ماسس-ستارت جارىسىنىڭ جەڭٸمپازدارى انىقتالدى, دەپ حابارلايدى قازاقپارات.
ٶكٸنٸشكە قاراي جارتىلاي فينالدا ٷزدٸك 16 سپورتشىنىڭ قاتارىنا ەنگەن وتانداسىمىز نادەجدا موروزوۆا فينالدا 15-شٸ ورىنعا تابان تٸرەدٸ.
وسىلايشا بٷگٸن كونكيمەن جٷگٸرۋدەن ەل نامىسىن قورعاعان اتلەتتەرٸمٸز جٷلدەدەن تىس قالدى.
بۇل سىندا بەيجٸڭ وليمپياداسىنىڭ التىن مەدالٸن گوللاندييالىق كونكيشٸ يرەن سحاۋتەن قانجىعاسىنا بايلاسا, كٷمٸس جٷلدەگە كانادالىق يۆاني بلوندەن يەلٸك ەتتٸ. ٷزدٸك ٷشٸنشٸ ورىندى يتالييالىق فرانچەسكا لوللوبريدجيدا جەڭٸپ الدى.
ايتا كەتەيٸك, وليمپيادا ويىندارىندا كونكيمەن جٷگٸرۋدەن ەرلەر اراسىندا ماسس-ستارت جارىسىندا قازاقستان ساپىنان دميتريي موروزوۆ قاتىستى. ول جارتىلاي فينالدا مەرە سىزىعىن 10-شى بولىپ كەسٸپ ٶتتٸ. بۇل نەتيجە وتانداسىمىزعا فينالعا شىعۋعا مٷمكٸندٸك بەرمەدٸ.
فوتو: سالي سابيروۆ, قازاقستان ۇوك
