دەرٸگەردٸڭ جالاقىسى ەكونوميكاداعى ورتاشا جالاقىدان 2,5 ەسە ارتىق بولۋى كەرەك. بۇل تۋرالى ۇلتتىق قوعامدىق سەنٸم كەڭەسٸنٸڭ 3-وتىرىسىندا قر پرەزيدەنتٸ قاسىم-جومارت توقاەۆ ايتتى, دەپ حابارلايدى قازاقپارات.
«كوروناۆيرۋس پاندەميياسى بٷكٸل ەلەمدەگٸ دەنساۋلىق ساقتاۋ جٷيەسٸ ٷشٸن شىن مەنٸندە اۋىر سىناق بولدى. بۇل احۋال ەلٸمٸزدە كەسٸبي دەرٸگەردٸڭ تاپشى ەكەندٸگٸن انىق اڭعارتتى. بۇعان ەڭبەكاقىنىڭ ازدىعى, ماماندىقتىڭ بەدەلدٸ بولماۋى, دەرٸگەرلەر قۇقىعىنىڭ قورعالماۋى سەبەپ بولىپ وتىر. تٷرلٸ سالا ماماندارى ٸشٸندە ەڭ تٶمەن جالاقىنى دەٸگەرلەر الادى», - دەدٸ قازاقستان پرەزيدەنتٸ.
وسى ورايدا مەملەكەت باسشىسى ٷكٸمەتكە بيىلدان باستاپ دەرٸگەرلەردٸڭ ەڭبەكاقىسىن كەزەڭ-كەزەڭمەن ارتتىرۋدى تاپسىردى.
«ولاردىڭ ايلىعى ەكونوميكاداعى ورتاشا جالاقىدان 2,5 ەسە ارتىق بولۋى كەرەك. بۇل كٶرسەتكٸشكە 2023 جىلعا قاراي قول جەتكٸزۋ قاجەت. وسى كٷردەلٸ كەزەڭدە بارشامىز مەديتسينا ماماندارىنىڭ قاجىرلى ەڭبەگٸنە كۋە بولدىق», - دەدٸ قاسىم-جومارت توقاەۆ.
