قۇرلىقتىق حوككەي ليگاسىنىڭ پلەي-وفف ساتىسىندا ەلوردالىق «بارىس» بٷگٸن, 8 ناۋرىزدا ەلوردادا رەسەيدٸڭ «مەتاللۋرگ» (ماگنيتوگورسك) كومانداسىمەن تٶرتٸنشٸ ويىنىن ٶتكٸزدٸ, دەپ حابارلايدى "ۇلت اقپارات".
ەستەرٸڭٸزگە سالا كەتەلٸك, جەڭٸستەر سەريياسى بويىنشا «مەتاللۋرگ» كومانداسى 2:1 ەسەبٸمەن الدا تۇرعان بولاتىن. پلەي-وفف ساتىسىنىڭ ماگنيتوگورسكٸدە ٶتكەن العاشقى ويىنىندا رەسەيلٸك كلۋب 7:3 ەسەبٸمەن جەڭسە, ودان كەيٸن سول قالادا بولعان تاعى بٸر كەزدەسۋدە «بارىس» وۆەرتايمدا 2:1 ەسەبٸمەن جەڭٸسكە جەتتٸ. ال 6 اقپاندا ەلوردادا ٶتكەن كەزدەسۋدە «بارىس» قارسىلاسىنا 1:2 ەسەبٸمەن جول بەرٸپ قويدى.
بٷگٸنگٸ ويىندا قوس كوماندا جەڭٸسكە جەتۋگە بار كٷشٸن سالدى. «مەتاللۋرگ» ساپىنان نيكولاي پروحوركين 3-مينۋتتا ەسەپ اشسا, 19-مينۋتتا «بارىس» حوككەيشٸسٸ مەتت فرەتتين تارازى باسىن تەڭەستٸردٸ.
ەكٸنشٸ كەزەڭنٸڭ 24-مينۋتتا رەسەيلٸك نيكولاي گولدوبين قايتادان ٶز كومانداسىن العا شىعاردى. ال 26-مينۋتتا ەلوردالىق دجەسسي بلەكەر مەرگەندٸك تانىتتى.
ويىننىڭ 52-مينۋتىندا رومان ستارچەنكو گول سوعىپ, اتالعان كەزدەسۋدە «بارىس» العا شىقتى. قازاقستاندىق كيريلل پانيۋكوۆ 59-مينۋتتا جەڭٸس شايباسىن سوقتى. ەلوردالىق كلۋب قارسىلاسىنان 4:2 ەسەبٸمەن باسىم تٷستٸ. وسىلايشا جەڭٸستەر سەريياسى 2:2 ەسەبٸمەن تەڭەستٸ.
جارىس تالابى بويىنشا پلەي-وفف كەزەڭٸنٸڭ شيرەك فينالىندا ەكٸ كوماندانىڭ بٸرەۋٸ تٶرت جەڭٸسكە جەتكەنگە دەيٸن سوزىلادى. قاجەت بولعان جاعدايدا قوسىمشا ويىندار 10, 12, 14 ناۋرىز كٷندەرٸنە بەلگٸلەنگەن.
