لوس-اندجەلەستە "التىن گلوبۋس" كينوجٷلدەسٸن تابىستاۋ رەسٸمٸ ٶتتٸ. بيىل "ەرەكشە دراما" نوميناتسيياسى بويىنشا "التىن گلوبۋستى" رەجيسسەر برايان سينگەردٸڭ "بوگەمدٸك راپسودييا" فيلمٸ ۇتىپ الدى. فيلم بريتاندىق روك-ۇجىم Queen توبى جايلى. وندا باستى رٶلدٸ سومداعان رامي مالەك ەڭ ٷزدٸك درامالىق اكتەر اتاندى.
"ەڭ ٷزدٸك رەجيسسەر" كاتەگوريياسى بويىنشا جٷلدەنٸ مەكسيكالىق الفونسو كۋارون الدى. ونىڭ "ريم" فيلمٸ "شەت تٸلٸندەگٸ ەڭ ٷزدٸك فيلم" اتاعىنا يە بولدى. بۇل تۋىندى بۇعان دەيٸن ۆەنەتسييا كينوفەستيۆالٸندە "التىن ارىستان" جٷلدەسٸن جەڭٸپ العان.
"ەڭ ٷزدٸك انيماتسييالىق فيلم" رەتٸندە "ٶرمەكشٸ-ادام: عالام كەڭٸستٸگٸمەن" فيلمٸ تانىلدى. ال, "ەڭ ٷزدٸك درامالىق سەريال" اتاعىنا اقش-تاعى كگب اگەنتتەرٸ جايلى "امەريكالىقتار" سەريالى يە بولدى.
كينەماتوگرافييا سالاسىنا قوسقان ٷلەسٸ ٷشٸن "التىن گلوبۋس" جٷلدەسٸمەن اكتەر دجەفف بريدجەس ماراپاتتالدى. "ەيەل" فيلمٸندەگٸ رٶلٸ ٷشٸن گلەنن كلوۋز ەڭ ٷزدٸك درامالىق اكتريسا رەتٸندە تانىلدى.
مايكل دۋگلاس "مەتود كومينسك" سەريالىنداعى رٶلٸ ٷشٸن ەڭ ٷزدٸك كومەدييالىق اكتەر اتاندى. دەل وسى جوبا ەڭ ٷزدٸك كومەدييالىق سەريال بولىپ تانىلدى.
بۇرىن "لا-لا-لەند" فيلمٸندەگٸ ەۋەن ٷشٸن "التىن گلوبۋس" العان امەريكالىق كومپوزيتور دجاستين گۋرۆيتس بۇل جولى دا "ايدا تۇڭعىش رەت" فيلمٸندەگٸ ەۋەن ٷشٸن جٷلدە جەڭٸپ الدى.
لەدي گاگانىڭ "جۇلدىز دٷنيەگە كەلدٸ" فيلمٸندەگٸ Shallow ەنٸ "ەڭ ٷزدٸك ساندترەك" بولىپ تانىلدى.
"التىن گلوبۋس" جٷلدەسٸ 1944 جىلدان بەرٸ جىل سايىن تاپسىرىلىپ كەلەدٸ. جٷلدەنٸ قۇرامىنا گولليۆۋدتا جۇمىس ٸستەيتٸن شامامەن 90 حالىقارالىق جۋرناليست كٸرەتٸن شەتەل باسپاسٶز اسسوتسياتسيياسى تاعايىندايدى.
"التىن گلوبۋس" جٷلدەسٸن ۇتىپ العان كارتينالار مەن اكتەرلەر امەريكا كينواكادەميياسىنىڭ ناگراداسى - "وسكار" جٷلدەسٸن ۇتىپ الۋى مٷمكٸن ٷمٸتكەر دەپ سانالادى.
