Ішкі істер министрі Ерлан Тұрғымбаев учаскелік инспекторлардың мәртебесін көтеру туралы Президент тапсырмасы қалай орындалып жатқанын айтып берді, деп хабарлайды ҚазАқпарат.
«Біз учаскелік инспекторлардың мәртебесін заңнамалық тұрғыда көтеріп келеміз. Президент өз сөзінде «қылмыстың алдын алатын негізгі фигура - учаскелік инспектор» деп атап өткен болатын. Ол жергілікті халықтың проблемаларын шешіп, қылмыстардың жолын кесіп, азаматтардың қауіпсіз болуын қамтамасыз етуі керек. Біз учаскелік инспекторлардың құзыретін арттырамыз. Оларға заңнамалық тұрғыда өздігімен тыйым салу, тәртіп бұзған азаматтарға шектеу қою құзыреттері беріледі. Мәселен учаскелік инспектор жанжал шығарған отбасы мүшесін үйден шығарып жібере алады. Учаскелік инспектор шешім қабылдай алатындай баптардың саны арттыру көзделген», - деді Ерлан Тұрғымбаев Мемлекет басшысының Қазақстан халқына жолдауында айтылған тапсырмаларын іске асыру барысы туралы өткен баспасөз мәслихатында.
Министрдің айтуынша ішкі резервтің, яғни штатты қайта бөлу есебінен елдегі учаскелік инспекторлардың санын қалыпты нормаға дейін жеткізу жоспарланған.
«Одан бөлек учаскелік инспектор лауазымы мерзімін 5 жылға дейін бекіту көзделген. Бұл өте маңызды. Сонымен қатар инспекторлармен бірге әкімдіктермен бірге жаңа учаскелік бекеттерді салу (оның ішінде тұрғын үйлермен қосылған) көзделіп отыр», - деді ол.
695 рет оқылды
